Kat shaba phai ngi la sakhi ia ki kam pynroi ha baroh ki liang; ong ka kyrtong MP ka NPP na Shillong

Syllad | The Rising MeghalayaMarch 1, 2024

Ka kyrtong MP ka Seng NPP na Shillong parliamentary seat kaba dei ruh ka Myntri sorkar, ka Dr Ampareen Lyngdoh ka la kyntait ba ka don ka jinghiar ka NPP (anti incumbency) namar ka jinglong nongïalam jong u Conrad Sangma uba ialam iaka Sorkar Meghalaya Democratic Alliance (MDA) ba mynta da kaba pynpaw ruh ba kat shaba phai la sakhi ia ka jingkiew jong ki kam pynroi ha baroh ki liang.

Haba kren sha ki lad pathai khubor ha ka 1 tarik Lber shibynta ka jingpynkhreh jong ka ia kane ka MP Lok Sabha ilekshon ka ban wan, ka Dr Ampareen ka la ong “Kaei ka Anti Incumbency. Wat hadien ka dorbar mang tyngka kaba la wanrah u CM, phi dang pyrkhat ia kum kata, ngam pyrkhat ba nga don jingtynjuh hangno hangno bad katba shaba ngi leit la iohi iaka jingwan ka roi ka par.”

Kala iathuh ruh ba kala wan na Rambrai hynniew bnai mynshuwa bad ka surok ka long kaba sniew tasam bad mynta kila ioh ka surok kaba paka.

“Peit sha ki nongrep ki la kham biang da bun shah haba ia nujor bad ki snem kiba la leit noh. Peit sha ki jingtreikam kiba kyntiew ia ka kamai kajih lyngba ki prokram bapher bapher ban kyntiew ha ka liang ka rep ka ring bad ka kam ri jingri. Kine baroh ki sakhi ba ngi la kiew shaphrang, bad kumta Ngam iohi ba ki jingpynpaw pyrshah kin long kiba don nongrim.”

Ka la ong ruh ba ki paralok synrop kiba don hapoh ka sorkar ruh ki la pynieng la ki jong ki kyrtong na ka bynta kane ka ilekshon Lok Sabha. “Ngi don ha ka juh ka sorkar. Nangno ka wan kata ka jingpyrshah sorkar? Phi don ia ka jaka kaba biang eh ban iathir halor kane ka mat bad kata ka long hapoh ka iingdorbar. Haba phim wan haba la rah ia ka mat kumta kumno ngin pynphai halor kine ki jingkynnoh? Ha ka jingtip ka jong Nga hi ngi la lah ban leh ia shibun bah ki kam ha baroh ki jaka,” ka la ong. 

Nalor kata ka la ong ruh ba kan ym shah pynthame ha kita ki jingialam bakla jong ki nongiakhun pyrshah lem kumta kan kan pynbakla noh ia ka thong bad ka jingthmu ban iakhun ia kane ka ilekshon namar ka iohi shai kdar ba ka mihkhmat ia ka party kaba khlieh ia ka sorkar synrop.

“Kiba bun ki kyrtong watla katta kin long ki paralok jong ngi (namar ki dei kiba don ha ka kynhun synrop), kumta ruh nangno ka jingkylli halor ka jingiapher jingmut ha kaba iadei bad ka jingkiew shaphrang jong ka jylla ka wan. Kin don ruh katto katne ki ban shu ia pyrta shla ba kane ka sorkar kam shym la leh ei ei, hynrei ngin pynphai ia kine ki jingkynnoh lyngba ka rai kaba shai khnang ba kan shong ha ki paidbah ka jylla ba kin shim ia ka rai. Hato phi kwah ia ki MP ki ban iasaid halor ki mat jong ka jylla hadien ba la shah jied ia ka kam MP lane da kumwei pat, kata kam lei lei mano ban leit sha Delhi,”la  ong kane ka kyrtong ka NPP.

“Hynrei lada phi kwah ia ki MP ki ban kren na ka bynta u paidbah ka jylla, kumta ruh kiba bun ki mat jong ka jylla ia kiba la iakhun hapoh ki surok ha ka jingshisha ki dei ki mat ia kiba donkam ban shim rai hapoh ka sorkar pdeng. “Hato phi la ju ioh sngew halor kano kano ka jingiatai halor ki mat kiba long ka jingeh ha ki surok ki jong ngi na ka snem sha ka snem.Ngam tharai ba ngin ioh sngew, kumta Ngan leit sha ki paidbah da ka jingthmu kaba shai. Nga don hangne ban rah ia kine ki mat sha ka lynti kaba dei,” ong shuh shuh ka Dr. Ampareen.