Kem ki ANTF Jowai 3 ngut, kurup drok, pistol, pisa T.4 lak na Ialong

Syllad | The Rising MeghalayaJuly 5, 2022

Ka kynhun ki Pulit Anti Narcotic Task Force (ANTF), Jowai haka sngi ba Ar kila ioh kurup ia kawei ka pistol 7.65 mm ha ryngkat bad ki kuli 4 tylli, ka pisa T.4 lakh, 9 tylli ki synduk sabon bad u bitor ba suba ba dei u drok heroin bad la ioh kem ruh 3 ngut ki briew kynthup ia kawei ka kynthei na Ialong Park.

U Superintendent of Police, West Jaintia Hills District Bikram D Marak ula iathuh ba hadien bala ioh jingtip ba thikna ba don ki briew ba suba khaii drok ha Jowai, mar mar ka kynhun Pulit ANTF kila buddien ia kine ki briew bad kila ioh ban pakhang lynti iaki haka shnong Ialong, West Jaintia Hills District hajan ka lynti ban leit sha ka park haka por 3 baje nohphaisngi.

Ki pulit kila khynra iaka kali kiba kine ki suba nongdie drok ki pyndonkam kaba dei ka kali Maruti Gypsy bad kem iaki lai ngut kynthup ia kawei ka kynthei. Ki Pulit ka ANTF haba la khynra iaka kali kila ioh kurup ia katei ka pisa, ka pistol bad u drok ba suba u dei u heroin uba khia 108 grams.

Kiwei kiwei ki tiar ba la kurup ki kynthup iaki 3 tylli ki mobile, kawei ka dagger, ka kali ba kine ki suba nongdie drok ki pyndonkam, katta ka Maruti Gypsy bad kawei pat ka Maruti Car kaba dei ka taksi kamai.

Halor kane ka jingioh kurup ki Pulit kila register iaka case bad ka jingtohkit ka dang iaid shakhmat.