Kem ki BSF bad pulit ia 2 ngut ki nong Bangladesh

Syllad | The Rising MeghalayaNovember 2, 2024

Ki shipai Border Security Force (BSF) ka Meghalaya ha ryngkat ka jingiatreilang bad ki bor pulit ha ka 1 tarik u Naiwieng ki la ioh ban kem noh ia arngut ki nong Bangladesh kiba pyrshang ban wan rung tuh sha u pud u sam ka India lyngba ki jaka khappud ka East Khasi Hills.

Hadien ba la ioh ia ka jingtip kaba thikna, ki BSF na ka 4th Battalion ki la pyntip mar mar sha ki bor pulit ka Pynursla Police Station.

Ha kaba ki la pynlong ia ka jingpynap shrip bad ioh ban bat noh ia kawei ka kali Wagon R kaba don ia u No. ML-05 AC 1946 na ki bynta jong ka surok NH 40 hajan Pynursla.

Hadien ba la pynlong ia ka jingtalasi ia ka kali, ki bor pahara ki la lapdien ia arngut ki nong Bangladesh bad u nongniah kali uba dei na India ia uba la suba donkti ha kaba iarap ban pynjam lyngba ia kine ki arngut sha u pud u sam ka India. Hadien kane la kem noh ia baroh laingut bad la kurup noh ia ka kali.

Ka jingseisoh jong kane ka jingkhynra ka pynpaw ia ka jingkut jingmut ba skhem jong ka Tnad shipai BSF bad ka Tnad Pulit na ka bynta ka jingshngain ha ki jaka khappud jong ka ri bad ban khanglad ia ki kam wan rung tuh.

Ia kine ki briew ba la ioh kem bad ia ka kali la aiti noh sha ka tnad pulit na ka bynta ban pynlong shuh shuh ia ka jingtohkit bad ban leh ia kaba donkam.