Kem ki BSF haduh 115 ngut, kurup ki tiar ba kot palat 11 klur na khappud ka Jylla

Syllad | The Rising MeghalayaApril 24, 2025

Ki shipai Border Security Force (BSF), Meghalaya Frontier ki la ioh ia ka jingjop ha ka jingiakhun pyrshah ia ki kam bymman da kaba kem haduh 115 ngut ki briew kynthup ia 78 ngut ki nong Bangladesh bad 37 ki nong India kiba donkti ha ki kam khaii beain bad ki kam wan rung tuh tang ha ki lai bnai jong une u snem.

Nalor kata ki shipai BSF ki la ioh ruh ban kurup ia shibun bah ki tiar ki tar beain kiba ka kot sha ka T.11.7 klur na ki jaka khappud .

Ha u kyrwoh u nongaiktien ka BSF Meghalaya u la ong, “Wat hapdeng kiba bun ki jingeh hynrei ki shipai BSF ki la ioh ia ka jingjop ha ka ban khanglad ia kiba bun ki jingpyrshang wan rung tuh da kaba ioh ruh ban kem noh ia hynriew ngut ki nongialam lynti kiba donkti ha ki kam pynrung tuh lyngba ki jaka khappud kaba la iarap shuh shuh ia ki bor pulit bad ki tnad sorkar ba kin shim ia ki jingpynshitom.

Hapdeng kitei ki lai bnai ki BSF ka Jylla ki la pynlong ia kiba bun tylli ki jingkhynra pyrshah ia ki kam khaii beain kiba la lam sha ka jingioh kurup ia shibun bah ki dawai kuli pynbuaid (Yaba tablet), u Kynja, ka Kyiad, ki jain, ki jingtah jingsleh bad haduh 750 tylli ki masi bad ki muid kiba la kynjoh baroh sha ka T.11.70 klur ia kiba la thmu ban shalan beain shapoh Bangladesh. U la ong ruh, “Kiba bun ki jingpyniasoh bad ki jingtip ba kongsan ki la paw pyrthei lyngba ki jingtohkit ia ki nong Bangladesh bad ia ki nongbtin lynti kiba la shah kem. Ia kine ki jingtip ia kiba la iasam sha ki bor pulit ka jylla lem bad kiwei ki tnad ban pynlong ia ki jingtohkit kiba kham bniah shuh shuh khnang ban lapdien ia ki kam bymman kiba iadei bad ki jingwan rungtuh bad ka jingpynlong ia ki jingkhynra ha kylleng ka ri India.”

Nalor ka kamram ban khmih ia ka shonsuk shongshngain, ki BSF ka Meghalaya ki don ruh ia ka jingkut jingmut ban iadon bynta na ka bynta ka bha ka miat jong ka imlang ka sahlang da kaba pynlong haduh 22 tylli ki Civic Action Program bad 13 tylli ki Blood donation camp, ki jingai jingsumar ei bad ka jingsam ia ki tiar ki tar ba kongsan sha ki nongshong shnong ha ki thain khappud.

Ban khmih halor ki jinglong jingman ha ki jaka khappud, ka BSF ka la bteng ruh ban ai ka jingiatreilang bad ka Border Guards Bangladesh (BGB), da kaba pynlong ia ki jingialang hapdeng ki heh shipai ban pynbeit ia ki jingeh kiba iadei bad ki jaka khappud bad halor ki kam wan rung tuh, ki lynti khaii beain bad halor ka leit ka wan jong ki kynhun runar.