Kem ki BSF ia 3 ngut ki nong Bangladesh kiba thmu leit trei sha Kashmir

Syllad | The Rising MeghalayaJuly 1, 2024

Ki shipai Border Security Force (BSF) ka Meghalaya ki la ioh ban kem noh ia laingut ki nong Bangladesh kiba la wan rungtuh sha ki bynta khappud ka India lyngba ka East Khasi Hills District.

Kine ki laingut ki nong Bangladesh kiba la shah kem noh ki dei kiba la tip kyrteng kum u Mohibur Rehman (30) bad u Kudus Miah (25), kiba dei na Sunamganj district bad u Mubarak Hossain (16 snem rta) uba dei na Sylhet district.

Kane ka jingioh kem ia kine ki laingut ka la wan long hadien ba ka kynhun ki shipai BSF kiba don ha Dangar ki la pynieng noh ia kawei ka Maruti Alto namar ka jingsuba, bad bat ioh ia arngut ki nongshong shnong kiba dei ki nong India bad laingut ki nong Bangladesh.

Ha ka jingtohkit, kine ki nong Bangladesh ki la kam ba ki la wan rung beain sha u pud u sam ka India da ka jingthmu ban leit wad jingtrei bylla shapoh Kashmir.

Hadien kane la aiti noh ia kine ki briew sha ki bor pulit hapoh Dangar PS, EKH ba kin pynlong shuh shuh ia ka jingtohkit kaba kham bniah.