Kem ki BSF ia 4 ngut ki nong Bangladesh bad u trai shnong na ki bynta khappud ka EKH

Syllad | The Rising MeghalayaApril 5, 2025

Ki shipai Border Security Force (BSF) Meghalaya ha ka 3 tarik Iaiong ki la ioh ban kem noh ia saw ngut ki nong Bangladesh bad uwei u trai shnong uba dei u nongbtin lynti na ki bynta khappud jong ka ri na ka thain Pynursla, East Khasi Hills.

Ki BSF ki la ioh ban kem noh ia kine ki briew katba ki dang pyrshang ban wan rungtuh sha u pud u sam jong ka India lyngba kitei ki jaka khappud.

Hadien ba la ioh ia ka jingtip kaba thikna lyngba ki tnad syntiat halor ka jingdon jong ki briew kiba thmu ban wan rung beain ha katei ka thain, ki BSF na ka 4th Battalion mardor ki la pynlong ka jingkhynra ban pynpulom ia katei ka jingthmu.

Ha kane ka jingkhynra ki BSF ki la ioh ban kem noh ia kine ki saw ngut ki nong Bangladesh bad uwei u nongbtin lynti uba dei u nongshong shnong ka thain Pynursla uba iarap ha kaba iadei bad kane ka jingthmu ban wan rung beain.

Ki BSF ki la aiti noh ia kine ki briew kumjuh ia ki tiar ki tar kiba la ioh kurup sha ki pulit ka Pynursla Police Station na ka bynta ban pynlong shuh shuh ia ka jingtohkit bad ban leh ia kaba donkam katkum ka ain.

Naduh u bnai Kyllalyngkot 2025, ki shipai BSF ka Meghalaya ki la ioh ban kem haduh 78 ngut ki nong Bangladesh, kaba pyni ia ka jingtrei shitom bad ka jingaiti lut na ka bynta ban iada ia ki jaka khappud jong ka ri bad ban khanglad ia ki kam bymman kynthup ia ki kam wan rungtuh jong ki briew kiba na bar sha u pud u sam jong ka ri.