Kem ki BSF ia 4 ngut ki nong India, kurup saw tylli ki kali ba kit mar ba shongdor 10 lak

Syllad | The Rising MeghalayaOctober 1, 2024

Ki shipai Border Security Force (BSF) ka Meghalaya ha ka 30 tarik u Nailur ki la ioh ban kem noh ia sawngut ki nong India kiba donkti ha ki kam khaii tuh bad ioh kurup noh ia saw tylli ki kali kiba kit shini na ki bynta khappud ka East Khasi Hills.

Hadien ba la ioh ia ka jingtip kaba bniah ha kaba iadei bad ka jingdon ki kali kit shini kiba thmu ban leit sha Shella lyngba ka surok Ichamati bad sha ki bynta khappud, ki BSF ka 110 Battalion ki la ioh ban bat noh ia ki sawtylli ki kali, kata 3 tylli kiba kit shini bad kawei kaba kit rynsun kiba shongdor haduh palat T.10 lak baroh.

Hadien ka jingtohkit bniah ki nongniah jong kine ki kali kim shym la lah ban pyni ia ki kot ki sla kiba biang ha kaba iadei bad ka jingpynkit ia kine ki shibun bah ki mar.

Hadien ki BSF ki la kem noh ia kine ki sawngut ki briew bad kurup noh ia ki mar bad ki kali bad aiti noh sha ka ophis ka tnat Custom ha Bholaganj ban leh ia kaba donkam.