Kem ki BSF ia u nong Bangladesh ryngkat ka pisa 2 lak tam, kurup tiar khaii tuh T.15 lak na khappud

Syllad | The Rising MeghalayaSeptember 24, 2024

Ki shipai Border Security Force (BSF) ka Meghalaya ha ka 23 tarik Nailur ki la ioh ban kem noh ia uwei u nong Bangladesh najan ki bynta khappud ha South West Khasi Hills District namar ka jingthmu ban leh ia ki kam beain.

Hadien ba la ioh ia ka jingtip kaba bniah, ki BSF ka 1st Battalion ki la pynlong ka jingkhynra kaba kyrpang hajan BOP Kanai bad ioh kem noh ia u nong Bangladesh uba kyrteng u Tonik Hajong 38 snem rta uba dei na Netrakona district, Bangladesh uba don jingthmu ban leh ia ki kam beain lyngba ki jaka khappud. Na une u briew la ioh ruh ban kurup ia ka pisa Bangla 2,37,500 Taka.

Ha kawei pat ka jingkhynra ha kane kajuh ka sngi, ki BSF na ka 4th Battalion ki la ioh ban kurup shibun bah ki tiar jingtah jingsleh pynbhabriew kiba kot sha ka palat T.15 lak ia kiba la thmu ban khaii beain shapoh Bangladesh.

Ha kane ka jingkhynra kumba 4-5 ngut ki runar kiba donkti ki la iehnoh ia kine ki tiar hadien ba ki la iohi ia ki shipai bad phet krad noh sha ka jaka khlaw.

Ia utei u briew ba la shah kem la aiti noh sha ki bor pulit ka thain katba ia ki tiar ba la ioh kurup la aiti sha ka tnad custom ban leh ia kaba donkam.