Kem ki pulit ka EJH ia 4 ngut kynthup ia ka snar khaii drok na Pynthorbah

Syllad | The Rising MeghalayaJune 24, 2024

Ki pulit na ka Tnat Anti Narcotic Task Force (ANTF) ka East Jaintia Hills ha ka 24 tarik sngi Nyngkong ki la ioh ban kem noh ia saw ngut ki nongkhaii drok kaba kynthup ia arngut ki kynthei ha ryngkat u drok heroin.

Kine ki briew kiba la shah kem noh ki dei kiba la tip kyrteng kum u Sahin Hussain Laskar, u Rofiqul Alom Laskar, ka Mamta Sinha (baroh kiba dei na Cachar Assam) bad ka Maya Gwala kaba dei ka snar nongkhaii drok na Pynthorbah Shillong, ong ka khubor pulit.

Hadien ba la ioh ia ka jingtip kaba bniah halor ka jingdon jong ki arngut ki briew ha ryngkat kawei ka longkmie kiba wan da ka kali shimet na ka liang Silchar ha ryngkat ki mar ba beain, kumta ki pulit ka ANTF ka EJH ki la pynlong ka jingpynap shrip ha Umtyra.

Ki pulit kiba la ioh ban bat noh ia kane ka kali ki la pynlong ia ka jingtalasi ha ryngkat ka jingiadon lang ki sakhi ba laitluid, ha kaba ki la lapdien ia 15 tylli ki song sabon kiba don ia u drok heroin uba khia haduh 164.99 gram ia kiba la buhrieh da kaba teh ha ki kjat jong kane ka longkmie.

Hadien ka jingtohkit kine ki briew ki la phla ba ia kine ki song ki thmu ban pynpoi sha kawei pat ka briew kaba la tip kyrteng kum ka Maya Gwala ba ju khot Puchki ia kaba la ioh ban kem noh na Khliehriat, ong ki pulit.

Hadien kane la rejister case pyrshah ia kine ki briew hapoh Khliehriat police station bad ka jingtohkit ka dang iaid shakhmat.