Kem ki pulit sa arngut ki dkhot ka kynhun sleeper cell jong ka HNLC 

Syllad | The Rising MeghalayaJuly 11, 2024

Ki Pulit ka Ri Bhoi District kila ioh kem noh sa ia arngut ki dkhot ka kynhun sleeper cell jong ka seng Hynniewtrep National Liberation Council (HNLC) ia kiba la tip kyrteng kum u Sanbor Rapsang na Mawlai Umjajew bad u Kynsaijun Thabah na Umlyngka, Upper Shillong.

U Superintendent of Police ka Ri Bhoi District u Jagpal Singh Dhanao u la ong ba ki pulit ki la ioh ban kem noh ia u Sanbor Rapsang ha ka 11 tarik mynta u bnai na ka thain Mawlai katba ia u Kynsaijun Thabah la ioh ban kem naduh ka 5 tarik mynta u bnai.

Haba bteng ban pynlong ia ka jingtohkit halor ka Umiam PS case No. 46(06) 2024 ba la register hapoh ki kyndon 120 B/506/384/511 IPC R/W Sec 10/13/17/18 UA(P) Act, ki pulit ha u bnai Jylliew ba la dep ki la ioh ban kem ia sawngut ki dkhot ka kynhun sleeper cell ia kiba la tip kyrteng kum u Cyfrank Paul Pariat, Kitbok Mujai, Barnabas Lyngdoh bad u Wanpynshngain Dympep bad ioh ban kurup noh ia ki bom IED kumjuh ia ki tiar shna bom.

Ha ka jingtohkit u Cyfrank Paul Pariat u la phla ba u la wan pyndep ia ka jingshah hikai kaba shi bnai sha Bangladesh ha ryngkat uwei pat uba la tip kyrteng kum u Kynsaijun Thabah uba na Umlyngka, Kynton Block-II ha u bnai Naitung 2023 haduh u bnai Nailar 2023.

U SP u la pyntip ba la kem noh ia u Kynsaijun Thabah ha ka 5 tarik mynta u bnai ha kaba u la phla ba u dei u dkhot jong ka HNLC bad ba u la leit ban shah hikai pyntbit ha ryngkat u Cyfrank Pariat.

U la ong ruh lyngba ka jingtohkit ia u Kynsaijun u la pynmih ia ka kyrteng jong u Sanbor Rapsang uba la iarap ha kaba iadei bad ka leit ka wan ka jong u sha Bangladesh ha u snem ba la dep.

Kumta ki pulit ha ka 11 tarik mynta u bnai ki la ioh ban kem noh sa ia u Sanbor Rapsang na ka thain Mawlai, bad ka jingtohkit ka dang iai bteng ha kaba iadei bad ki jingtreikam jong ka seng HNLC.