Khajiak Chaphang Ka World Rabies Day
Ka World Rabies Day da pynman kyrpang kam ka lad ïow wanrah ïa ka ïutip ha pyrdi ki paidbah ïow pynwiar wow pyndooh ïa kani ka khlam kjutbieit (Rabies) ha kylleiñ satlak ka pyrthai. Man ko leh kam ka lad ïow pyn ïatyllilang ïa ki bru, ki seiñ wapher wapher, ka sorkar wa kiwi kiwi ki nongchim bynta ïow iakrehlang ki pyrchah ïa kani ka kjut nei bynta i bha i miat ka imlang sahlang.
Kam wa kynmo warom ïa u moomer ïong kani ka sngi, ha uni u snem ka phang ïong ka World Rabies Day 2021, toh kamni- “Rabies: Facts, Not Fear”. Iwa mut toh: i u man i kiwa thooh du ïa ki jingsakhiat chaphang kani ka kjut, u pynduh noh i ïa ki jingsñiawthuh bakla waroh wei wym toh u tieñ i ki ini i kjut.
Ïa kani ka sngi World Rabies Day da pynman ïa ka man u snem ha ka 28 tarik September. Da jied ïa kani ka sngi, kam ka dak wow kynmo warom ïa ka sngi ïap u Louis Pasteur – uwa man u nongchem nyngkong ïa ka dawai tika pyrchah ïa kani ka kjut Rabies.
Ka Meghalaya Veterinary Services Association, Jaintia Hills District Unit, da jooh pynman ko ïa ki prokram wapher wapher deiwa ïakrehlang chirup wa ka Ophis ïong u District A.H. & Veterinary Officer, West Jaintia Hills, Jowai wa u District A.H. & Veterinary Officer, East Jaintia Hills, Khliehriat. Kam ka ïutip ïa ki paidbah, ïa kani ka tika pyrchah ïa ka kjut rabies kawa khut i ka “Anti-Rabies Vaccine”, hadooh katni leh dang esikai nae pynsñiawthooh (awareness) ha waroh ki dispensary wa ki hospital ïong ka chnat A.H. & Veterinary ïong ka jylla ïong i. Da pynchlur ïa ki paidbah u wanrah ïa ki jingri ïong ki ïow e ïa kani ka tika khamtam ïa ki ksaw wa ki miaw. Kani ka jingïakrehlang emkaam bha ko neibynta u wanrah ïa ka jingjop pyrchah ïa kani ka kjut wei wow ïatyllilang i deiwa pyrkhat i ïow poi i cha ka thong chirup wa ka pyrthai waroh kawi. Katae ka thong toh da khut ki ka – ka“Zero by 30”, iwa mut wa ymtoh de u em kani ka kjut chwa u snem 2030.
Kani ka khlam Covid-19 da wanrah ko boon ki jingmutdur wa boonjait chaphang ki jait kjut wapher wapher, ki rukom ïa bi ki, wa ka rukom e tika ïong kini ki jait kjut. Neitae i daw, em ka jingtieñ ïong ki paidbah u e tika nei bynta ka tika Covid-19 ha boon ki ri ha pyrthai hi wa ha ri India ïong i. Hei ïatoh wa ka kjut Rabies, kani ymtoh ka kjut kawa dang thymme wei wa da tip bha i chaphang ïong ka nadooh tynde. Neitae i daw, ha uni u snem, kani ka phang ‘facts, not fear’, da pynjoor ko u pynpyrkhat ïa i khamtam chaphang ki jingsakhiat ïong kani ka kjut wei ymtoh u ap i ïa ki wyrta hamsaia namo ki ïutip wymem nongrim kiwa joor du i pyntieñ ïa ki paidbah chaphang ini i kjut.
Ki Ïutip Wasakhiat (Facts): Ki ïutip wasakhiat neibynta wow wanrah ïa ki khubor wasakhiat, wow pynduna ïa kani ka kjut Rabies deiwa e tika i ïa ki jingri ïong i wei wow e sikai i ïa ki paidbah chaphang ka rukom ïabi kani ka kjut wei wa kammon u ïe i u lait u ioh ïa kani ka kjut. Khlem ki khubor wa sakhiat kiwa thikna, ym ïe i u tip wa katwon i rukom joor lane rukom poor kani ka kjut. Emkaam u tip i ïei sakhiat, lym kamtae tae daw boon ki bru wa ki mrad wow ïap da ki phaw hajar ngut man u snem na i kjut Rabies.
Ka Jingtieñ (Fear): Kani em ko 3 jingmut ha kani ka phang uni u snem. Nyngkong, mut ko chaphang ka jingtieñ wa da wanrah da kani ka kjut Rabies, ka jingtieñ ki paidbah hawa chah dait ki ha ki mrad wa em kjut Rabies. Ka wa-ar, mut ko chaphang ka jingtieñ ki paidbah ha wa da ioh kjut ki hadien wa da ïabi kani ka kjut na kiwi ki bru wa ki mrad. Kawa khatdooh, mut ko chaphang ka jingtieñ lyngba ki khubor wym sakhiat (fake news) wa ki ïutip ki wym em nongrim kiwa pyntieñ ïa ki paidbah u phah e tika ïa ki jingri ïong ki.
Kamtae da kyntu ïa ki paitbah ïow ïakrehlang ki deiwa pynbna du ïa ki khubor kiwa sakhiat, wei ymtoh u pynbna ïa ki khubor pyntieñ paidbah khnang wa ka thong ïong ka pyrthai waroh kawi wow pynduh jait ïa uni u khniang kjut Rabies u man i iwa jop.
Ïow tip chooh chooh deiwa rap bniah, ïe phi ki paidbah u ïoh ïa ki kot lyngkdop (pamphlets) na kiwon kiwon ki chnat ophis ïong ka A.H. & Veterinary.
By | Dr. FR Shadap
Secretary Meghalaya Veterinary Services Association
Jaintia Hills District Unit
Facebook
Instagram
Youtube
Twitter
Leave a Reply