Khang District Magistor ban lum paidbah haka jaka bret ñiut thymmai ka Jowai Municipal Board

Syllad | The Rising MeghalayaDecember 23, 2021

U District Magistor jong ka West Jaintia Hills District ula pynjari da ka kyndon aiñ 144 CrPC ban tem ia kino kino ki jingkynad kaba lah ban ktah iaka shongsuk shongsaiñ hadien ba ki nongshong shnong ba marjan ka jaka bret thymmai kaba don hajan ka shnong Sohphoh kila pyrshah iaka jingbret ñiut ka Jowai Municipal Board (JMB).

U District Magitor ula ong ba ka ophis u Deputy Commissioner ha ryngkat ki tnad ba don bynta kala lum jingialang haka 8 tarik u Naiwieng 2021 bad la rai baka Jowai Municipal Board kan bret iaki ñuit kiba mih na sor Jowai ha kawei ka jaka shimet kaba don ha ha Mooshutsdai Mookabeng bad la iasoi ruh iaka soskular hadpeng ka trai jaka bad ka Jowai Muniicpal Board haka 9 tarik u Naiwieng 2021.

La bthah iaka Jowai Municipal Board ba kan pynthikna baka jingbret ñiut kan nym ktah iaka sawdong sawkun ka mariang.

Pyrshah bret ñiut ki paidbah ha Constituency u Myntri Pynroi Sor

U District Magistor katkum ka bor bad iktiar kaba la pynkup ula pynjari da ka kyndon aiñ 144 CrPC ban khang lad iaki briew ban lum paidbah palat iaka 5 ngut bad ban rah ruh iaki tiar pynmynsaw kaba kynthup iaki dieng, maw, bad kiwei kiwei ki tiar pynmynsaw ha katei ka jaka bret ñiut kaba don ha Mooshutsdai-Mookabeng.

Shuh shuh ka hukum kala bthah ruh ia u Executive Officer, Jowal Municipal Board ban pynthikna baka jingbret ñiut kan long katkum Solid Waste Management Rules, 2012 kaba la pynmih da ka Ministry of Environment, Forest and Climate Change haka 8 tarik u bnai Iaiong (April) 2016 bad ban shimkhia ban pynneh iaka jingkhuid jingsuba katkum ka jingdawa jong ki shnong ba marjan bad baka jingbret niut kanlong kaba iadei bad ka mariang.