Khang iaki sengbhalang bad ki briew kiba nabar ban ïuhkjat sha Umlaper

Syllad | The Rising MeghalayaAugust 27, 2021

Hadien bala mih ka jingiakynad ha Umlaper, ka shnong khappud kaba la kam da baroh arliang ki Jylla, ka Meghalaya bad Assam, ka bor synshar district jong ka Ri Bhoi bad ka West Karbi Anglong kila rai ban pynneh iaka shongsuk shongsain ha kane ka shnong kila khang shipor ia ki briew kiba nabar kynthup iaki sengbhalang ban hiar sha ka shnongUmlaper.

Ia kane ka rai ban khang ia ki briew kiba nabar la shim haka sngi Palei haka jingilang kyrpang kaba long ha Sabuda haka jingiadonlang ka Deputy Commissioner ka West Karbi Anglong ka Utpala Saikia, ka Deputy Commissioner ka Ri Bhoi District ka Kong R.M Kurbah bad ki SP jong ki ar district.

Ka jingiakynad ha Umlaper kala jia naduh ka miet sngi Nyngkong hadien ka jingkynnoh ba shah shoh lai ngut ki Khasi ha ki pulit Assam kaba la wanrah ka jingpyrshah kaba jur bad la tem iaka jingiakynad hadien ka jingiakren pynbeit haka sngi ba Ar.

Hynrei haka sngi Balang kala mih biang ka jinghuri hura hadien ba ka kynhun jong ka HYC Ri Bhoi bad kala mih ka jingpyrshah na kijaidbynriew Karbi bad Nepali. Kala don ruh ka video kaba la saphriang ba iashoh ki pulit jong ka Assam bad Meghalaya.

Ka Deputy Commissioner ka Ri Bhoi District, ka Kong R.M Kurbah ka la ïathuh ba katkum ka rai ba la shim ha katei ka jingïakynduh ha Sabuda na baroh ar district ka long ban ban tem ïa kino kino ki jingïakynad hapdeng ki paidbah nongshong shnong na Assam bad na Meghalaya.

Kala ong ba baroh ar district la mynjur ban khang shuwa shipor ïa kino kino ki kynhun sengbhalang ne ki riew paidbah kiba na shabar katei ka thain kaba kynthup na baroh ar district ne Jylla ban hiar sha Umlaper tad haduh bala wan biang ka shongsaiñ.