Khang ka bor shynshar district WJH iaki dukan, kyntu iaki dukan bad kali ban tah iaka Vaccinated bad Not Vaccinated

Syllad | The Rising MeghalayaJuly 5, 2021

Wat hadien ba ka sorkar kala pynjynsur bad ailad iaki dukan bad nongshong die madan ban plie iaki dukan dukdoh kumjuh iaki kali ha ryngkat bad ki sngi bad ki nomber ba kyrpang, phewse la lap ba dang bun byllai kiba la leh bymsalia ban kohnguh iaki adong adit COVID-19 ban tem iaka jingpur ka khlam haka district.

Mynta ka sngi Nyngkong ka bor synshar district hapoh ka jingialam u Additional District Magistrate Lyngkor Kynjing bad u Executive Magistrate ma MA Challam kila hiar biang sha Iawmusiang ban jurip iaki dukan bad ki nongdie madan ha Iawmusiang kumjuh ki kali kamai la ki tah ne em iaka jingthoh ‘Vaccinated bad Not Vaccinated’, hynrei la lap ba dang bun byllai kibym shym la tah ia kane ka kyntien kaba dei halor ka jingai tika bad bym ai tika.

La lap shuh shuh bad wat ki dukan bam kiba la ailad ban plie bad pynshlur ba ki dei ban song haka jaka ban bam hapoh dukan, hynrei ki dang don ki dukan kiba leh saitlah bad ki magistor kila khang ia kine ki dukan ha Iawmusiang.

Shuh shuh ki nongshong die madan ruh hadien ba ka bor district kala ai da ka jaka kyrpang dang don hi kiba die ha ki lynti bad dei haba la hiar ki nongialam shnong ka Iawmusiang bad ki magistor la kynriah sha ka jaka kaba la buh iaki ban die.

Haba phai sha ki kali kamai, haduh mynta ka sngi ki magistor ki dang hap ban sam iaka jingthoh Vaccinated bad Not Vaccinated.

La ioh jaka kyrpang ki nongdie madan ha Jowai

Ka bor synshar district kala kyntu ia baroh ban bud ryntih iaki jingbthah jong ka sorkar khnang ba ka jingthmu ban iakhun pyrshah iaka khlam kan long kaba jop.

Ka West Jaintia Hills katkum ka report ka tnad ka koit ka khiah ki don haduh ka sngi Nyngkong ka don 577 ngut kiba dang shitom na ka jingpang khlam bad ka jingdon ki briew kiba la iap na kane ka jingpang ki don 82 ngut, hadien bala khlad sa 2 ngut.

Ka bor district kala pynjari iaki kyndon pynjari hapoh ka district manla ka miet da ka Corona Curfew 5 Pm haduh 5 Am.

Ka bor district kala kyntu ia baroh iatreilang bad ban bud ryntih iaki kyndon COVID-19 ban tem iaka jingsaphriang ka khlam hapoh ka district.