Khang ka District Magistor ia ka jingtih maw tih shyiap beaiñ najan ki wah ha East Khasi Hills

Syllad | The Rising MeghalayaJanuary 5, 2024

Ka District Magistrate East Khasi Hills, kala pynmih da ka hukum katkum ki kyndon 144 CrPC kaba khang pyrshah ia ka jingtih maw tih shyiap beaiñ khamtam na ki par maw kiba don ha ki sharing lum bad na ki wah kiba don ha ki bynta bapher bapher jong ka district.

Kane ka jingmaham ka long ruh khamtam hadien ba ka ophis ka la ioh ia ki jingtip halor ki kam tih maw tih shyiap beain khamtam ha ki thain Sohiong, Mawblei bad Umphyrnai kiba la ktah jur ia ki tyllong umbam um dih jong ki shnong kiba don marjan.

Kane ka long ruh katkum ka hukum ka National Green Tribunal, New Delhi kaba la khang pyrshah ia kino kino ki briew, kompeni bad kiwei pat ba kin leh ia ki kam tih maw tih shyiap na ki wah kiba don hapoh ka ri khlem da ioh Mining Licence /Quarry Permit na ki bor ba dei khmih.

Nalor kata la ong ruh ba kane ka jingtih maw tih shyiap beain ka wanrah khah khah ia ka jingtwa jong ki maw bad ka jingtuid jong u shyiap bad kiwei pat ki marpoh khyndew  na ki jaka sharing lum shapoh ki wah bad kaba wanrah ka jingshah pynjulor jong ki mar rep,  ki dohum dohwah bad ia ka mei mariang.

Kumta ruh na ka liang ka DC ka East Khasi Hill ka pyntip ba la pynjari mardor ia kane ka hukum ha baroh kawei ka District tad haduh da pynbna da kumwei pat