Khang ka District Magistrate ia ka jingpyniatur masi ha East Khasi Hills

Syllad | The Rising MeghalayaFebruary 13, 2025

Ka The District Magistrate (DM) ka East Khasi Hills District ka la pynmih ia ka hukum kaba khang pyrshah ban pynlong ia kino kino ki jingiakop pyniatur masi hapoh ka District baroh kawei.

Ka DM ka la pynjari da ka kyndon 163 BNSS ha ka District kaba maham tyngeh ba kino kino kiba pynkhein ia kane ka kyndon kin ngat ha ka jingshah pynshitom katkum ka ain.

Katkum kane ka hukum ba la pynmih hynne ka sngi 13 tarik Rymphang ka DM ka la ong ba na ka liang ka ophis ka la ioh pdiang ia ki jingtip ba ka jingpynlong ia ki jingiakop pyniatur masi ka jur bha ka District khamtam ha ka por ba pynlong ia ki Fete bad kiwei pat ki tamasa ha ki katto katne ki bynta jong ka District.

Kane ka hukum ka la ong ruh ba lada shah ban pynlong ia ki jingiakop pyniatur masi kane kan pynkhein ia ka kyndon 11 jong ka Prevention of Cruelty to Animals Act, 1960 bad ia ka hukum jong ka Iingbishar Supreme Court kaba la khang pyrshah ia kiba kum kine ki jingpyrshang ha ka hukum ba la pynmih ha u snem 2014.