Khang ka District Magistrate ia ka rally pyrshah bam doh masi ioh mih ka huri hura

Syllad | The Rising MeghalayaSeptember 27, 2024

Ka District Magistrate East Khasi Hills, ka Kong RM Kurbah ha ka 27 tarik Nailur ka la pynjari da ka kyndon Section 163 jong ka Bharatiya Nagarik Suraksha Sanhita (BNSS) kaba khang pyrshah ia kino kino ki kynhun kiba thmu pynlong jingialang ne rally ha ki bynta jong ka Nongbah Shillong.

Kane ka jingpynjari kyndon ka la wan long ruh hadien ba ki la don ki kynhun Seng Hindu kiba thmu ban pynlong ia ka rally ‘Gau Dhwaj Sthapana Bharat Yatra’ ha kane ka nongbah Shillong ha ka 2 tarik u Risaw u ban wan ha kaba ka lah ban pynmih ia ka jinghuri hura bad ktah ia ka shongsuk shongshngain ha ka nongbah Shilong bad ka District baroh kawei.

Ka District Magistrate ka la ong ruh ba haduh mynta ym pat shym la don satia kino kino ki kynhun ki ban wan pan jingbit na ka bynta ban pynlong ia kane ka rally.

Kumta la pynjari da kane ka hukum kaba khang pyrshah ia kano kano ka jingialum briew bad pynlong jingialang bad kiba ialeh pyrshah kin shah pynngat ha ki kyndon ain 223 jong ka BNS bad kiwei pat ki kyndon ain kiba iahap. Ka pyntip ruh ba kane ka hukum ka la treikam mardor tad haduh da pynmih hukum da kumwei pat.

Lah ban kdew ba kane ka jingpynmih hukum ka la wan long ruh shi sngi shwa ka jingwan iuhkjat jong ka kynhun Seng Hindu, ka Jyotish Peethadheeshwar Shankaracharya Avimukteshwarandah ba ialam da u Jagadguru Shankaracharya na ka bynta ka rally ba la pynbna ban pynlong ha ka 2 tarik Risaw.

U National Media In-Charge ka kynhun Jagadguru Shankaracharya Maharaj u Shailendra Yogi Sarkar ula pyntip ba u nongialam ka kynhun u Shankaracharya un wanpoi sha Shillong haka 28 tarik Nailur lyngba ka kad liengsuin ha Umroi.

Nalor kata u la pyntip ruh ba u Shankaracharya un sa pynher ia ka lama masi hapoh ka Gau Dhwaj Sthapana Bharat Yatra bad ban dawa pynbna ia ka masi kum ka “Kmie ka Ri’ bad ruh ban dawa pyntreikam ia ka Ain da ka Sorkar Pdeng ban khang noh ia ka jingshoh doh ia ka masi”.