Khang ka DM East Jaintia Hills ban pynlong ia ki jingpyniatur masi

Syllad | The Rising MeghalayaFebruary 15, 2025

Ka District Magistrate, East Jaintia Hills District ka la pynmih ia ka hukum kaba khang pyrshah ban pynlong ia kino kino ki jingiakop pyniatur masi hapoh ka District baroh kawei.

Na ka liang ka District Magistrate ka la pynjari da ka kyndon 163 BNSS ha ka District kaba maham tyngeh ba kino kino kiba pynkhein ia kane ka kyndon kin ngat ha ka jingshah pynshitom katkum ka ain.

Ha kane ka hukum ba la pynmih ha ka 14 tarik Rymphang ka la ong ba na ka liang ka ophis ka la ioh pdiang ia ki jingtip ba ka jingpynlong ia ki jingiakop pyniatur masi ka jur bha ka District khamtam ha ka por ba pynlong ia ki Fete bad kiwei pat ki tamasa ha ki katto katne ki bynta jong ka East Jaitnia Hills District.

Katkum kane ka hukum la ong ruh ba lada shah ban pynlong ia ki jingiakop pyniatur masi kane kan pynkhein ia ka kyndon 11 jong ka Prevention of Cruelty to Animals Act, 1960 bad ia ka hukum jong ka Iingbishar Supreme Court kaba la khang pyrshah ia kiba kum kine ki jingpyrshang ha ka hukum ba la pynmih ha u snem 2014.