Khang ka DM East Khasi Hills ia ki kam beain ha Lum Shyllong ha ka sngi lehkmen Snem Thymmai

Syllad | The Rising MeghalayaDecember 21, 2024

Ka District Magistrate ka East Khasi Hills District, Shillong, ka Kong RM Kurbah ka la pynjari da ka kyndon 163 jong ka BNSS kaba la khang pyrshah ia ki kam beain kum ki jingiakhalai bad kiwei kiwei ha Lum Shylllong (Shillong Peak) ha ka sngi lehkmen Snem Thymmai.

Ka la ong ba lada ailad ia kiba kum kine ki kam beain ka lah ban wanrah ka jingshah pyndik jong ki riew paidbah bad kan ktah jur ruh ia ka jinglong kyntang bad ka burom jong ka Riad ba ka Hima Mylliem hi baroh kawei.

Kumta ka District Magistrate ka la ong ba la hap ban pynjari da ki kyndon kiba khang pyrshah namar ka jingioh khubor ha kaba iadei bad ki kam ia khalai bad kiwei kiwei pat ki kam beain kiba la jia ha Lum Shillong ha ki sngi lehkmen Snem Thymmai man la u snem bad ruh halor ka jinglum pisa beain na ki paidbah kum ka bai rung bad pynieng kali ha Lum Shyllong.

Kumta la maham tyngeh ba kino kino kiba ialeh pyrshah ia kane ka hukum kin ngat ha ka jingshah pynshitom kat kum ka kyndon 223 BNSS.