Khang ka JSU iaka jaka tylliat maw shna surok ka GR Infra Projects Ltd ha Mynkre

Syllad | The Rising MeghalayaJanuary 29, 2022

Ka Jaintia Students’ Union (JSU), Khliehriat Circle haka sngi Saitjain kala khang iaka jaka tylliat maw jong ka company GR Infra Projects Ltd kaba don haka shnong Mynkre, East Jaintia Hills District hadien ba kala lap ba kane ka jaka tylliat maw kala pynmih iaka tdem kaba jakhlia kumjuh ki pui pui kiba la her kylleng kaba lah ban ktah iaka koit ka khiah bad ka sawdong sawkun ka mariang.

Ka GR Infra Projects LTD kadei ka company kaba shna iaka surok National Highway 6 bad ka don iaka jaka tylliat maw ne ka crusher ha Mynkre, East Jaintia HIlls District.

Ka JSU kala kam ba kala lap tynkrein ba kane ka company kala pynmih iaka tdem kaba jakhlia na ka kor tylliat maw khlem da khein shuh iaka sawdong sawkun bad ka haw haw bad leh bymsuidniew iaki nongshong shnong khlem da shim ia kino kino ki lad jingiada ban pynmih iaka tdem.

U president ka JSU Khliehriat Circle Livingson Sana ha ryngkat u vice president Laski Siangshai bad kiwei kiwei ki dkhot ka JSU kila shim iaka rai ban khang shipor ia kane ka jaka tylliat maw ka GR Infra Projects Ltd tad haduh ba kala lah ban pynbiang iaki lad jingiada ban lait jaboh ka haw haw.