Khang ka KHADC ban sahmiet hapoh Iewduh, pynkhlain ia ki bor pulit

Syllad | The Rising MeghalayaMay 24, 2024

Ka Executive Committee jong ka Khasi Hills Autonomous District Council (KHADC) ha ka 24 tarik Jymmang ka la shim ia ka rai ban khang pyrshah ia ki briew ba kin sahmiet hapoh ki dukan kiba don ha Iewduh naduh ka 1 tarik u bnai Jylliew 2024.

Haba kren sha ki lad pathai khubor u Chief Executive Member (CEM) ka KHADC u Bah Pyniaid Sing Syiem u la pyntip ba hadien ka jingialang ba la ia don lang u Syiem ka Hima Mylliem bad ki Myntri nalor ki dkhot na ka kynhun Seng Hynniewtrep Iewduh Association (HIA) la rai ba ki dukan ha Iewduh ki dei ban khang noh hapoh ka 10 baje mynmiet.

U la ong ruh ba kane ka jingshim rai ka la wan long hadien ka jingialang kaba la long bad ki hynriew Dorbar Shnong kiba don ha ki thain Iewduh ban iakren halor ka jingjur jong ki kam bymman bad halor ka jingshyrkhei jong u drok.

Ban pynthikna halor ki kam shongshngain hapoh Iewduh u CEM u la ong ba ka EC ka la shim ruh ia ka rai ban pynioh sa 10 ngut ki pulit enforcement ka KHADC na ka bynta ka duty miet ha ryngkat ki 10 ngut kiwei pat ki bor pulit jong ka Hima Mylliem khnang ban khanglad ia kino kino ki kam beain.

Nalor kata u la ong ruh ba ha ki por kiba la dep ki don katto katne ki trai dukan kiba la kyrpad ia ka Hima Mylliem ba kan shah ban phah sah briew hapoh ki dukan jong ki khnang ban khanglad na ka jingshah tuh shah thiem. Hynrei, u la ong ba kane kan pynshlur ia kiwei ruh ba kin wan ban sah ha Iewduh bad ka ban long pynban kum ka jaka shong briew.

Haba pynpaw halor ka jingshah kyndang ba dang shen jong ki briew kiba shong ba sah beain ha Lum Survey, une u heh ka KHADC u la ong, “Namar kane, ka Council ruh ka la pynmih ia ka jingmaham kaba tyngeh pyrshah ia kito kiba pyrshang ban pynkhein ia ka hukum namar ngin ym shah iano iano ruh ba kin shong ki sah hapoh Iewduh.”

“Kito ki briew kiba ju sha hapoh ki dukan da ka jingioh jingbit na ka Hima Mylliem mynta kin ym lah shuh ban sah naduh ka 1 tarik u Jylliew u ban wan,” u la bynrap.