Khang ka Sorkar ban wan hiar ka liengsuin ki shit niam Hindu ha Shillong Airport

Syllad | The Rising MeghalayaSeptember 27, 2024

Hadien ki jingpyrshah kiba jur na kiba bun ki liang, ka Sorkar Jylla ka la rai ban khang ia ka jingwan hiar ka liengsuin kaba kit ia ki nongialam ka seng shit niam Hindu, ka Jyotish Peethadheeshwar Shankaracharya Avimukteshwarandah hapoh ka kad liengsuin Shillong Airport ha Umroi.

Ka Sorkar ka la shim ia kane ka rai ha ka jingialang High Level Committee (HLC) ha ka 27 tarik Nailur hadien ba la pynthikna ba ka liengsuin kaba kit ia ki nongialam ka kynhun Seng Hindu kan wan hiar hapoh kane ka kad liengsuin lashai ka 28 tarik Nailur.

Ha kane ka jingialang ba la pyniaid da u Chief Secretary Bah DP Wahlang la ia don lang ruh ka Director General of Police (DGP), ki Deputy Commissioner ka East Khasi Hills bad Ri-Bhoi District nalor ki heh Ophisar ka Tnad Home (Police).

Haba kren sha ki lad pathai khubor, u Chief Secretary u Bah DP Wahlang u la ong, “Ban pynthikna ba kan ym mih kano kano ka huri hura hapoh Ri Bhoi bad East Khasi Hills, ngi la shim ia ka rai ban thoh sha ka Airport Authority of India (AAI) ba kam dei satia ban aijingbit ia ka liengsuin kaba kit ia kine ki briew ba kan ioh hiar hapoh kane ka kad liengsuin ha Umroi.

 “Ngi la ioh jingtip ba ki don ki kynhun ki ban pyrshang ban wan hiar lashai ka sngi da ka liengsuin hapoh Umroi bad ruh ban pynlong rally ha ka kyrteng ban iada ia ki masi bad kumjuh ban pynthikna ban khanglad ia ka jingpyniap masi hapoh ka ri,” u la ong.

U la ong ruh ba katkum ka jingtip ba la ioh kane ka kynhun kam pat shym la ioh satia kano kano ka jingbit na ka bynta ban pynlong ia kane ka rally kaba ka la pynbeit ban pynlong ha ka 2 tarik u Risaw u ban wan.

Nalor kata u pyntip ba na ka liang ka ophis ka District Magistrate ka East Khasi Hills ruh ka la pynjari da ka kyndon 163 jong ka BNSS kaba khang pyrshah ban pynlong ia kino kino ki jingialang ne rally bad na ka liang ki bor district ka Ri Bhoi ruh kin shim ia kane ka juh ka sienjam khnang ban pynthikna ba kan ym mih kano kano ka huri hura ka ban pynthut ia ka shongsuk shongsaun hapoh East Khasi Hills bad Ri Bhoi.

Shuh shuh u Chief Secretary u pyntip ba ka sorkar ka la iamir jingmut ruh ba ka Central Puja Committee kaba la pynpaw ba kim kyrshan satia ia kane ka jingthmu pynlong rally jong katei ka kynhun.