Khang ka Wapungskur ia ka jingrung ka mih ki briew hapoh shnong

Syllad | The Rising MeghalayaApril 4, 2020

Ka Dorbar Chnong Wapungskur, lyngba u kyrwoh ba la pyllait da u Waheh Chnong jong ka, u Ma Satly Ryngkhlem, kum shibynta ban iatrei lang bad ka sorkar ha ka jingiadei bad ka jingkhang khyrdep iaki shnong ki thaw hapoh jong ka Ri India ban tehlakam ia ka jingpur ka jingpang khlam COVID-19, ka la khang pyrshah ia ka rung ka mih jong ki briew  baroh hapoh u pud u sam jong ka shnong.

Ka Dorbar Chnong Wapungskur ka la khang pyrshah ia ki briew baroh na bar shnong naduh ba pynmih ia kane ka jingpynbna, ban rung ban mih hapoh u pud u sam iong ka shnong, lait noh satang ba ki don ki daw bym lah ban kiar, kata ruh yn pdiang tang ia kito kiba ioh jingbit na ki bor sorkar.

Ka Dorbar Chnong Wapungskur, ka la khang pyrshah ruh ia baroh ki ki nongshong-shnong jong ka ba kim bit shuh ban mih na la shnong ban leit jingleit shano shano lait noh satang ba don ki daw ki bym lah ban kiar.

Ka Dorbar Chnong Wapungskur kala kyntu ruh ia baroh ki nongshnong-shnong jong ka ba kin sngewbha ban iashong khop ha la ki jong ki jong ki iing ki sem bad ban kiar na kaba iarung ia mih na kawei ka iing sha kawei pat.

Ka Dorbar Chnong ka la kyntu ruh ia ki bor sorkar ba kim dei ban ai jingbit klumar ia kino kino ki briew ki ba wan pan jingbit na ki ban ioh rung shapoh u pud u sam jong ka shnong lait ki briew jong ka sorkar.

Ki kali kiba iaid lynti lyngba ka NH-6, ka surok u ba iaid lyngba ia ka shnong kin leit kin wan kat kum ba la ai bor ia ki na ki bor sorkar, hynrei yn ym shah pat ia ki ba ki ieng lane sangeh klumar hapoh u pud u sam jong ka shnong.