Khang khyrdep ka HYC ia ka ophis u director NEIGRIHMS ba phiel pyntreikam ia ka bhah nurse kynthei bad shynrang
Ka Hynniewtrep Youth Council (HYC) ha ka 4 tarik Iaiong ka la khang khyrdep ia ka ophis treikam jong u Director ka North Eastern Indira Gandhi Regional Institute of Health & Medical Sciences (NEIGRIHMS) N Mehta hadien ba um shym la lah ban pynbeit ia ka jingdawa kiba iadei bad ka rukom thung kam nurse ha kane institute.
Ka HYC kynsan kala pynlong ïa ka jingïakhih bad tur sha ka ophis treikam jong u Director, NEIGRIHMS hadien ba la kut ka jingai por kaba hynniew sngi.
La iohi ba ki bor pahara jong ka NEIGRIHMS kila lah ban leh eiei, namar ba ki dkhot bad nongialam ka HYC kila rung jubor sha kamra treikam jong u Mehta, da kaba dawa ia u, ba un mih noh mardor.
U Mehta bad ki heh jong u ki la shah pynbor ban mih noh na administrative block ka NEIGRIHMS
U president ka HYC u bah Roy Kupar Synrem haba iakren bad u Mehta shabar ka Director’s Administrative Block u la ong, “Ngi la aiti ia ka memorandum ha kaba iadei bad kane naduh ka 24 tarik u Lber bad ka jingai por kaba hynniew sngi kala kut noh mynta ka sngi. Namar ba kam shym la don kano kano ka jubab na ka ophis u director, ngim don da kawei pat ka lad hynrei ban pynlong ia ka jingiakhih.”
Hadien kane, u Director u la khot ruh ïa ki nongïalam ka HYC ban ïakren halor kane ka bynta.
Hadien ka jingialang, u bah Synrem u la pyntip ba ka seng ka la ioh ia ka jingthoh na u director ba ka NEIGRIHMS kan thaw ia ka jaka thoh eksamin hapoh ka jylla Meghalaya bad ka HLL kaba la ithuh da ka sorkar pdeng kan long ka tnad thung kam.
U la ong ba kawei na ki jingdawa ba kongsan jong ka HYC ka long ban pyntreikam ia ka ratio kynthei bad shynrang kaba 80:20 kumba la leh ha AIIMS bad kiwei kiwei ki jaka pule.
“Ha kaba iadei bad kane, u director u la pynthikna ba un thoh mardor sha ka Union Health Ministry ban ioh ia ka jingshai ne ka jingmynjur la ka NEIGRIHMS ka lah ne em ban pyntreikam iaka jingthungkam 80:20 iaki kynthei bad shynrang namar kumba ka long kam don kum kata ka kyndon ha ki kyndon thung kam ne Recruitment Rules (RR) jong ka institute ban pyntreikam ia kane ka RR bad na ka bynta kata kin donkam ia ka jingmynjur jong ka tnad ka koit ka khiah jong ka sorkar pdeng,” la ong u Synrem.
“Hynrei ngi la kren shai bha ba ngin ym ailad ïa ka rukom thung kam ban ïaid shakhmat lada ïa ka jingdawa ban ïoh ïa ka jingïapher kynthei bad shynrang kaba 80:20 ym shym la pyntreikam ha kane ka institute,” u la bynrap.
Shuh shuh, u president ka HYC u la pyntip ruh, “Ngi la dawa ruh ba ki dei ban pyntreikam ïa ka 44% ka bhah kyrpang na ka bynta ki ST katkum ka OM jong ka tnad Personnel ha kaba ka NEIGRIHMS ka la shim katto katne ki sienjam. Kine baroh ki dei ka jingïaid lynti sha kata. Ka jingthmu ka long ban pynthikna ba ki briew jong ngi kin ïoh kham bun ki lad iohkam ha NEIGRIHMS, NEHU bad kiwei ki shlem jong ka sorkar pdeng nama ha kaba kut ka dei ka sorkar Meghalaya kaba la ai jaka ia ki ban seng ia ki institute jong ki hangne da ka jingthmu ba ki briew jong ngi kin ioh kam bad ioh admission hynrei kaei kaba la jia ha kine ki institution baroh ka long ba ka iaid pyrshah ia kata ka jingkhmih lynti.Kane ka la pynlong ia ngi ban khang tala ia ka ophis jong u director bad ka administrative block.”
Haba kylli, u bah Synrem u la ong ba ka HYC kan ap bad peit shwa ban shim ia ka sienjam kaba bud halor katei ka mat.
“Ka jingaplai online kan kut ha ka 20 tarik u Iaiong, kumta lehse ha kata ka por ngin sa tip la ki jingdawa jong ngi kin urlong ne em. Ngi shai ba yn nym shah ia ka rukom thung kam lada ym pyntreikam ia ka jingkhein kynthei bad shynrang kaba 80:20,” u la ong
Facebook
Instagram
Youtube
Twitter
Leave a Reply