Khang khyrdep ka KSU ia ki bank bad ophis ki bym burom ia ka lehniam Behdienkhlam

Syllad | The Rising MeghalayaJuly 3, 2024

Ka Khasi Students’ Union (KSU) ha ka 3 tarik mynta u bnai ka leit ban khang khyrdep noh ia ki katto katne tylli ki bank bad ki ophis hadien ba la shem ba kim shym la burom ia ka shad niam Behdienkhlaim kaba dei ka jingleh niam jong ki trai ri trai muluk kiba dei ki Pnat ia kaba ju pynlong man la ka snem, kata wat hadien ba la pynbna ia kane ka sngi kum ka sngi shuti da ka sorkar Jylla.

Namar kane ka jingbym burom ia kane ka sngi ba kyrpang jong ki trai muluk, kumta ka Seng ka la leit ban khang khyrdep noh ia kiba kum kine ki bank bad ki ophis kiba don ha ki bynta bapher bapher jong ka nongbah Shillong.

Kine ki jaka treikam kiba ka seng ka la leit ban khang khyrdep ki kynthup ia ka ophis jong ka Tnat Food Corporation of India (FCI) kaba don ha Mawlai Mawroh, ki bank bad ki ophis shimet ha ka thain Lumdiengjri, Motphran, Khyndailad, Laban, Laitumkhrah, Malki, Nongthymmai, Nongmensong bad kiwei pat.

Na ka liang u nongialam ka Seng u la ong ba ka jingplie jong kine ki jaka treikam ha kum kane ka sngi ba kyrpang  ka pynpaw halor ka jingbym burom ia ki trai muluk ka Jylla.

Nalor kata u la maham ruh ia baroh ki ophis, ki jaka pule bad kiwei pat ki tnat treikam ki bym burom ia ki sngi ba kyrpang bad ia ki jinglehniam ba la rakhe da ki trai ri trai muluk hapoh ka Jylla.