Khang lynti ka khyndew ba tuid na Jowai Bypass iaka wah Myntdu shlei um ki surok, khyllem ki post, ioh shuti ki skul kolej

Syllad | The Rising MeghalayaMay 29, 2024

Ka jingwan ther jur u slap ryngkat ka lyer kaba khlain bor ha West Jaintia Hills District kala wanrah ka jingshlei um ki lynti ki syngkieng, ki surok bah bad ka jingtwa khyndew ha wah Myntdu kaba la khang lynti iaka wah.

Kane ka jingshlei bad ka jingtwa khyndew kala jia haka por kumba 1 baje eiei nohphaisngi hala 29 tarik Jymmang.

Ka bor mariang kaba la khie bitar kala pynkhyllem bun tylli ki post bording, kala wanrah iaka jingshlei um ki surok.

Kaba kham shyrkhei shuh shuh kalong ba ki bynta ba shaneng ka wah Myntdu, ka khyndew bad ki maw kiba mih na ka jingshna surok Jowai bypass kila tuid lut sha wah Myntdu bad khang lynti iaka um. Kane ka umsaw kaba la pynshlei iaka wah kala poi sha iing briew. Ha kane ka jingjia kam don kano kano ka jingjia kaba sngewsih.

Nalor kata ka um kaba wan na kylleng ki shnat kala pyndap smam iaka jingkieng Myntdu hajan ka sor Jowai bad ki lynti syngkieng haki surok bapher bapher.

Ka jingwan ther jur kala pynlong ruh iaka bor district west Jaintia Hills ban pynbna shuti iaki skul, colleges bad universities haka 30 Jymmang.