Khang pyndonkam iaki khynnah haki jingialap elekshon MDC & MP

Syllad | The Rising MeghalayaJuly 19, 2023

Ka Deputy Commissioner ka East Khasi Hills District kaba dei ruh ka District Election Officer ka la maham tyngeh halor kano kano ka jingpyndonkam da ki khynnah kiba dang hapoh rta ha ki jingialap ilekshon ha kane ka ilekshon MDC bad MP 2024.

Ka jingpynmih ia kane ka hukum ka long sha baroh ki khyndai tylli ki party sain hima kiba don ha ka jylla Meghalaya, kata ka National People Party (NPP), Voice of the People Party (VPP), Indian National Congress (INC), Hill State People Democratic Party (HSPDP), People’s Democratic Front (PDF), United Democratic Party (UDP), All lndia Trinamool Congress Party (AITC), Bharatiya Janata Party (BJP) bad ka Khun Hlynniewtrep National Awakening Movement (KHNAM).

Na ka liang ka DC bad DEO ka district ka la pyntip ba ha kane ka ilekshon MLA kaba dang shu dep mynta u snem 2023, ki la ioh pdiang ia shibun ki jingujor halor ka jingkynnoh pyndonkam jong ki party sain hima da ki khynnah kiba dang hapoh rta ha ki kam ialap ilekshon, ki jingiaid rally ki jingrah slogan bad kiwei kiwei.

Kane ka jingthoh ka la pynpaw ruh ba kane ka hukum kaba la khang pyrshah ban pyndonkam da ki khynnah ha ki kam ilap ilekshon la pynmih na ka National Commission for Protection of Child Rights katkum ka shithi F.No.A-11033/77/2017-Admn dated 20/01/2017 bad da ka Election Commission of India“ lyngba ka shithi No.464/lns/2017-EPS dated 21/02/2017 .

Kumta ruh na ka liang ka DC bad DEO ka EKHD ka pyntip ba ki sienjam ban khanglad ia kine ki jingkynnoh kiba iadei bad ka jingpyndonkam ia ki khynnah ha kane ka ilekshon KHADC 2024 bad kumjuh na ka bynta ka ilekshon Lok Sabha 2024, la pynmih ia kane ka hukum sha baroh ki party sain hima.

Shuh shuh lyngba kane ka jingpyntip la maham ia baroh ki party sain hima ba kin kiar ban pyndonkam ia ki khynnah ha kaba iadei bad kino kino ki kam kiba iadei bad ki jingialap ilekshon lem kumta kin ngat ha ka jingshah pynshitom katkum ki kyndon ain.