Khang pyndonkam plastik bun rong ka Iawmusiang

Syllad | The Rising MeghalayaJuly 30, 2020

Ka Dorbar Shnong Tympang Iawmusiang kala shim iaka rai bad khang pyrshah ban pyndonkam iaki plastik bun rong hapoh u pud u sam jong ka shnong Iawmusiang, Jowai.

Ia kane ka rai yn pyntreikam naduh 1 tarik u bnai Nailar bad baroh ki dukan bad paidbah kim bit shuh ban pyndonkam iaki plastik bunrong.

U waheh shnong Tympang Iawmusiang, Ma Edystone Shylla ula ong kila shim ia kane ka rai ban jop iaka jaboh plastik kaba la ktah iaki sawdong sawkun ka mariang khamtam iaka wah Myntdu ka wah kaba pynbiang umbam umdih iaka shnong Jowai.

Shuh shuh la pyntip ruh ba ka dorbar shnong kan khang ruh iaka lynti shapoh iew kaba dei ruh ka surok shnong na ka bynta ban pynlong ka jingsynreit dawai khniang haka sngi Thohdieng bad Saitjain.

Ka Dorbar shnong Tympang Iawmusiang kala khot ka jingiatreilang jong ki paidbah ki nongshong iew, ki nongdie dukan ha kaba iadei ban pynduh pyndam iaka plastik bad ban wanrah iaka khuid suba ka shnong ka thaw.