Khang pyniap dohkha dusmon ha Wah Lukha

Syllad | The Rising MeghalayaAugust 22, 2020

Ka 6 shnong Wah Lukha Association ha ka jingialang kaba la long haka 15.08.2020 haka shnong Kuliang kala rai ban khang pyrshah ban pyniap dusmon iaki dohkha ha Wah Lukha da kaba thang dynamite (blasting) bad wieh dawai bih.

“Ngi la ioh jingtip ba dang don ki briew ba shim kabu ban pynbthei dynamite ha kine ki sngi ba la dep kaba la wanrah iaka jingiap ki dohum dohpnat,” la ong u Ma Daiapherbha Lamare Secretary 6 Shnong Wah Lukha Association.

Ka 6 Shnong Wah Lukha Association ka khot ka wer ia baroh ki rawon kiba wan khwai sha kane ka wah ban iatreilang bad ka seng da kaba pyntip sha ki nongkitkam lada lap ia kino kino kiba pyniap pathar ia ki dohkha dohpnat ha kane ka wah.

Ka 6 Shnong Wah Lukha Association kala maham tyngeh ba lada lap ia kiba thang dynamite ha wah Lukha kan pynshitom ia ki katkum ki kyndon aiñ treikam ka synjuk bad ban aiti ruh sha ki bor jong ka aiñ kumba la mana da ka ophis u Deputy Commissioner East Jaintia Hills, Khliehriat ban pynngat ia ki ha ka ain Fisheries Act 1897 bad United khasi Jaintia Hills District Fishery 1954.