Khang pyrshah ka Dorbar Elaka Raliang ban pyniap pathar iaki mrad mreng bad thang khlaw, shim rai ruh iaki kyndon ialap election

Syllad | The Rising MeghalayaJuly 25, 2023

Ka Dorbar Elaka jong ka Elaka Raliang ban tyngkai iaki jingai ka mariang haka sngi 24 tarik Naitung kala shim iaka rai ban khang pyrshah ban pyniap pathar iaki mrad ki mreng bad ban thang iaki khlaw ki btap.

Ka Dorbar Elaka kala shim ia kane ka rai haka jingialang kaba long ha dorbar hall haka ka shnong Raliang, kaba ha kaba la donlang ki Waheh Shnong, ki riew rangbah, ki samla bad ki longkmie naki shnong bapher bapher hapoh ka Elaka.

Ia kane ka dorbar la pyniaid da u Pa Daloi U ma Chawas Lyngdoh u ba long ruh u Chairman jongka Dorbar Elaka. Ha kane Dorbar da kawei ka sur kala shim iaki  kine ki rai harum:

• Ka Dorbar Elaka kala rai ban khang pyrshah ha baroh kawei ka Elaka ba ymbit satia ban thang lum/thang khlaw mamar ka pynduh jait iaki jingthung bad kiwei pat ki jingthaw ba im.

• Ym bit satia ba siat/ lane pyniap ia ki sim ki doh bad ki mrad ki mreng baroh.

• La rai ban iatreilang bad ka tnad Forest khnang bad dup lah ban teh lakam ia kiba ialeh pyrshah.

Kiwei pat ki rai ba ka Dorbar Elaka kala shim ka dei halor ka shongsuk shongsain ki shnong ki thaw ha baroh kawei ka elaka khamtam ha ka por Election MDC, MLA bad MP.

Ka dorbar elaka kala khang pyrshah ia baroh ki candidate ban wan ialap palat iaka 4-tylli ki kali rit sha baroh ki shnong kiba hap hapoh u pud u ang ka elaka, lait noh tang haka Rally kumba la ai jingbit da ka Election Commission ka Ri India.

La khang pyrshah ia ki Candidate ba kim bit satia ban ai ja lane kino kino ki jingdih pynbuaid lalit naka sha ia ki paidbah ha ka por baki wan ialap Election.

Ban pyntreikam bad pyrkhing bha ia kine ki rai, ka Dorbar Elaka kala kyrpad bad bthah iaki Dorbar Shong bapher bapher ban pynbna shnong shisyndon ia kine ki rai ka Dorbar Elaka bad ban ai ka jingiatreilang na naka bynta ka jingbha bad ka jingmyntoi jongka Elaka baroh kawei.