Khang pyrshah ka Dorbar Shnong Pamrapaithlu ban rung ki candidate bad ki briew ba nabar ha kaba iadei bad ka kam MDC election

Syllad | The Rising MeghalayaFebruary 10, 2025

Ka Dorbar Shnong Pamrapaithlu, East Jaintia Hills District ka la shim ia ka rai ban khang pyrshah ia ki candidate bad ki nongmihkhmat jong ki ban rung ban mih hapoh shnong ha kaba iadei bad ka election MDC sha ka Jaintia Hills Autonomous District Council (JHADC).

U Waheh Shnong Pamrapaithlu Ma Leningstar Rymbai ula ong “Kane ka dei ka jingpyntip paidbah sha baroh ki nong shong shnong bad ki ba nabar shnong kumjuh ba kat kum ka jingialang ka Executive Body ka Dorbar Shnong Pamrapaithlu, ka ba la long mynta ka sngi 10/02/2025 ha ophis Dorbar Shnong, da ka wei ka sur ka jingialang ka la rai ban khang pyrshah ia ki candidate bad ki briew jong ki ban rung ban mih ha poh ka shnong Pamrapaithlu ha ba iadei bad ka kam MDC sha ka JHADC 2025.”

La ong ba ka jingthmu jong ka Dorbar shnong ban leh ia kane ka long na ka bynta ban khang lad ia ki kam shongshit election bad ban wanrah ka ia ka shong suk shong sain ka shnong ka thaw baroh kawei. Kine harum ki rai kiba la shim ka dorbar shnong bad la kyntu ia baroh ban bud ryntih.

Kino kino ki candidate/ki briew jong u/ka candidate ki ba kwah ban kynduh ia ki nong shong shnong phi lah ban ia contact ne iakren bad ki briew jong phi ki ba dei ki trai shnong lajong.

Kane kam shem mut ban khang ia ka sngi ne ka tarik campaign/ialap election jongphi, hynrei tang hapoh ki sngi bym don ka campaign.

Ka Dorbar shnong Pamrapaithlu ka ai laitluid ia baroh ki nong shong shnong ba kin jied ne thep ia ka vote jongki ia u/a candidate ba ki mon.

Kane ka ain kan treikam naduh mynta ka tarik 10.02.2025 tad ha duh ba la kut ka Election MDC, kata 21.02.2025.”