Khang pyrshah ki ar seng nongkhaii ban wanrah Dewiong ki Company Dewbilat na bar Jylla

Syllad | The Rising MeghalayaJuly 5, 2019

KHLIEHRIAT: Ha ka jingialang kaba la long ha ka 26 tarik une u bnai ba ladep ha Sweet Chilly Hotel, Mynkre, East Jaintia Hills ha kaba ha kane ka jingialang la ia kynduhlang ki dkhot bad nongialam ka All Jaintia Cement & Clinker Transporters’ Association bad ki dkhot bad nongialam ka Coal Suppliers Association– ka seng ki nongshallan dewiong sha Kharkhana pynmih Dewbilat.

Ia kane ka jingialang la pyniaid da u ma Hambertus Nongtdu uba dei u President ka Coal Supplier Assocation.

Ha kane ka jingialang la shim ia kawei ka rai ban khang pyrshah ia baroh ki Company pynmih dewbilat ba kin wanrah ia u Dewiong na bar jylla.

Na ka liang u ma Balen Thubru uba dei u President ka All Jaintia Cements & Clinker Transporters’ Association u la iathuh ruh ba hadien ka jingiatai kaba sani bha, la shim ruh ia ka rai ban maham jur ia kino kino ki nongshallan (Transporters) dewiong kiba wanrah ia u dewiong na bar jylla. kine ki ar seng kin pynshitom ia ki katkum ka rai kaba la shim ha katei ka jingialang lada lap ba ki don kiba wanrah dewiong na bar jylla sha kitei ki Kharkhana Dewbilat kiba don ha East Jaintia Hills.

Shuh shuh u ma Balen Thubru u la iathuh ba hadien katei ka jingialang, na ka liang ki nongialam ka All Jaintia Cement & Clinker Transporters’ Association (AJCCTA) bad ka Coal Suppliers’ Association (CSA) ki la ia shong jingialang ruh bad ki heh Company ha katei ka juh ka sngi bad la pynsngew ha ki ia katei ka rai ba la shim da kitei ki ar seng.

Ha kajuh ka por, na ka liang ka AJCCTA ka la ai khublei ia ka sorkar MDA hapoh ka jingialam u Conrad K Sangma bad kumjuh ia u ma Lber Laloo kiba la wanrah ka jingjop na ka bynta ban weng ia ka rai khang khyrdep ban tih dewiong da ka NGT ha kaba ka Iing Bishar kaba ha khlieh duh ka la dep ban ai ia ka rai ha ka 3 tarik une u bnai na ka bynta ban ioh tih dewiong biang kumba ju long.