Khang sait kali bad leh jakhlia ha Wah Ratap bad Umpliang ban iada iaki doh um

Syllad | The Rising MeghalayaDecember 27, 2020

Ka Dorbar Shnong Umlyngsha kala pynmih iaka hukum ban khang ban sait kali ha ki artylli ki wah ba kynthup ia ka Wah Ratap bad Wah Umpliang ban iada na ka jingtuid ki jakhlia sha ka Wah Sailynter kaba ka shnong Umlyngsha, East Jaintia Hills District ka pyndonkam kala ai jingiada kyrpang iaki dohum dohpnat bad ban dih, ban sum bad kiwei kiwei ki jingdonkam ba man ka sngi

U NL Talang uba long u Waheh Chnong Umlyngsha u la ong “Lada sait kali ha kine ki wah kan ktah nyngkong ia ka thaw ri dohkha (Sailynter Fish Sanctuary) kaba don sha rum ka wah ba jngai tang 150 Meter na Wah Umpliang.”

Ula ong ba dei halor kane ka shnong ban iada ia kane ka wah bad ban nym ktah iaki dohum dohpnat bad ki briew ba pyndonkam iaka um, ka bor shnong kala khang pyrshah leh jakhlia bad ban sait kali haka wah Wah Ratap bad Wah Umpliang.

Kino kino kiba wan kai bad kiba wan bam khana ha kitei ki thaw lane hapoh u pud u sam jong ka shnong ba kim bit ban leh jakhlia da kaba bret pathar iaki plastic, ki bitor bad kiwei kiwei shapoh um. Ha kajuh ka por ka shnong kala buh da ka por naduh 6:00 baje mynstep haduh 7:00 baje mynmiet ba shah ban bam khana.

Ka shnong Umlyngsha kala khang pyrshah ban pyniap pathar ia ki dohkha doh-um ha shilynter ki wah kba hap hapoh u pud ka shnong da kaba ber dawai bih, shoh karu, tongjar, tongmusari bad pynbthei dynamite.

Ka por ban tong um khamtam kito kiba najan shnong kalong naudh ka por 6:00 AM haduh 7:00 PM.

“Ka bor shnong kala pynpaw ka jingbynñiaw kaba khraw ba don katto katne ki briew haka sngi Saitjain kiba bam khana hadien bala dep bam khana kila bret pathar iaki ba tam kat shaba lap ba shem,” la ong u waheh shnong bad kyntu ia ki paidbah ban long kiba lehkhuid ban neh ka jingitynnad jong ka jaka.