Khang shnong ka Dong Moopyllaitsyiar Khliehtyrshi ban tem iaka jingpur ka khlam COVID

Syllad | The Rising MeghalayaJune 9, 2021

Ka Dong Moopyllaitsyiar, Khliehtyrshi hadien ka jingkiew ka jingiabit khlam COVID-19 ki briew bad ka jingduh noh ia ki mynsiem ba kordor hapoh ka dong, kala rai ban khang shnong haduh 10 sngi.

Ia kane ka Dong Moopyllaitsyiar, Khliehtyrshi kala pynbna haka sngi Balang hadien ka jingiamir jingmut bad u Waheh Shnong Khliehtyrshi. Da kawei ka sur ban tem iaka jingpur ka khlam kila shim iaka sien jam ban khang shnong 10 sngi naduh 10 tarik une u bnai bad ha kine sngi ym shah ia kino kino kiba na ka dong ban mih klumar bad kumjuh kiba na bar ban rung shapoh ka dong. Kiba niah kali kiba wan na kiwei ki jylla ruh kim bit satia ban rung shapoh ka dong Moopyllaitsyiar.

Ia ki ba donkam eh (Essential) bad ki ba leit rep leit riang ki lah ban mih hadien ba ioh jingbit na u Waheh Dong/Secretary Dong ne u Waheh Shnong. Ia ki jingdonkam jong ki paidbah ha poh kine ki sngi ia ki jingbam jing dih lah ban ioh na ki dukan kiba ha poh dong hi. La kyrpad ruh ia baroh ki nongshong shnong ban deng Mask haba ki mih shabar.

Ka dong Moopyllaitsyiar ka kyrpad ia ki paid nongshong shnong ban iaishah khnang ban lah ban pynduna ia ka jingpur sted u khniang jingpang COVID-19 hapoh ka dong ka shnat bad ka shnong ka thaw hi baroh kawei.