Khang tala ka JSM iaka ophis DSEO Jowai, thung ka sorkar iaki nonghikai LP bad UP

Syllad | The Rising MeghalayaApril 23, 2021

Na ka daw jong ka jingleh mynthi jong ka sorkar Jylla halor ka jingdawa ban thung nonghikai sorkar haki LP bad UP School ka Jaintia Students Movement (JSM) ki la leit khang tala ïaka ophis treikam jong ka tnat pule puthi kaba don ha nongbah Jowai haka sngi Palei hadien bala kut ka jingaipor ban thung iaki post nonghikai kiba thylli ha baroh ki skul hapoh ka district.

Ki dkhot jong ka JSM hashwa ban khang tala ïa kane ka ophis ki la phah mih lut ïa baroh ki nongtrei bad khang tala ïaki kamra SDSEO bad ka pakhang lynti iaka kyrdop ban rung sha ka ophis.

Ka bor District ba kynthup ïa u Magistrate u Bah MA Challam, u DSP ka West Jaintia u Bah MJ Marngar ryngkat ka kynhun pulit haba ïoh jingtip halor kane, ki la wan poi ha kane ka jaka bad ki la khot ïaki katto katne ngut ki dkhot jong ka JSM ban ïakren pynbeit ïa kane ka kam.

Katba dang ïaid ka jingïakren, ka DSEO ka la ïoh pdiang ïaka shithi na u Director of School Education & Literacy jong ka sorkar Jylla ban thung noh ïaka kam Assistant Teacher haki skul Govt. LP School bad Govt. UP School ha West Jaintia da kaba bud thikna ïaki kyndon ba la buh haka pule puthi. Kine ki nonghikai kiban thung ki dei kiba la pass iaka MTET.

U Ribok Biam Education Secretary JSM, ula ong ka jingkhang tala ïa kane ka ophis treikam ka long namar ba ka sorkar kam patiaw ïaki mat jingdawa jong ka seng ban thung nonghikai haki skul sorkar kaba kynthup iaki LP bad UP skul.

Ula ong ka sorkar Jylla lyngba ka tnad pule puthi ka la pynmih ïaka hukum haka 26/3/2021 ba ki skul kidei ban plie noh naduh ka 1 tarik Ïaiong 2021 hynrei haka jinglap jong ka JSM ki don haduh 10 tylli ki skul sorkar ki bym don wat tang iwei ruh i nonghikai.

Ka Kong A Syiem DSEO, ka la pyntip ba ïaki shithi thung kam yn pynpoi sha ki nonghikai hapoh shi taïew. Ka DSEO ka la pyntip ruh ba ki nonghikai haki Govt LP School ki don 226 ngut katba ki ha Govt. UP School ki don 14 ngut.

Nakaliang ka JSM ruh kala pdiang hun ia u soh bala mih na ka jingiakhih jong ka bad kala mih na katei ophis.

Kumban shu pynkynmaw ka tnad pule puthi jong ka sorkar Jylla ka la khot Application iaki nonghikai ba pass MTET na bynta ka post-Assistant Teacher haki skul Govt. LP/UP School ha u bnai Jymmang 2020 bad ka interview la pynlong ha u bnai Nohprah 2020 bad ïaka result la pynmih haka 25 tarik Rymphang 2021.