Khang tala ka KSU iaka Toll Gate ha Lumshnong, byrthen khang sa ha Ialong
KHLIEHRIAT: Ka Khasi Students Union (KSU), Jaiñtia Hills District Unit hapoh ka jingialam u President Ma Ohibait Dkhar ryngkat ka jingiatreilang ka KSU Narpuh Circle bad ka KSU Khliehriat Circle kala khang tala ia ka Toll Gate kaba don ha Lumshnong EJH haka sngi ba ar.
Ka KSU kala rai ban khang tala ia katei ka Toll Gate ka long ba la kut ka jingai por kaba 5 sngi ia ki nongtrei barjylla ha katei ka Toll Gate ban pynbiang ia ki kot ki sla ba donkam kum ka work permit ia ki nongtrei bad trading license.
![](https://www.syllad.com/wp-content/uploads/2024/09/JIT-Vacancy-823x1024.avif)
Ka KSU kala kam ba kala dep ban ia kynduh ia u Anup Bal uba na Kolkata uba dei u contractor jong ka Eagle Company Pvt. Ltd u ba dei artad u nongshim wai ia katei ka toll gate na ka NHAI ban lum khajna. Ha katei ka jingiakynduh bad une u kontrak haka 8 tarik une u bnai, ka KSU ka la dawa ba un pynbiang iaki tei ki kot ba donkam hapoh ka 5 sngi, hynrei wat haduh ba la khang tala, la lap ba wat tang uwei u nongtrei bar jylla ruh kim don satia ki kot ki sla ba ki dei ban pynbiang kaba lah ban ioh na ka Jaintia Hills Autonomous District Council (JHADC).
Shuh shuh ka KSU kala lap ba ha ka jingleit jurip ia ka surok bah NH-6 da ka KSU Narpuh circle dang ha kine ki khyndiat sngi la lap ba naduh Mynkre haduh Ratachera ja surok kala jot bad dap sha ki thliew ki syar.
Kumta ka Seng ka ieng pyrshah jur ba kumno katei ka company ka lah ban lum khajna haba ia ka surok pat kam shym la maramot bad halor kane ka nongrim ka KSU kala khang tala syndonia katei ka toll plaza kaba don ha Lumshnong.
Ka KSU kala byrthen ban kan sa leit khang tala ruh sa ia ka toll gate kaba don ha Ialong, West Jaintia Hills kaba pyniaid da katei ka company bad u juh u kontrak.
Leave a Reply