Khang tala ka KSU iaka toll gate ha Pasyih Ialong bym buh street light ha surok bah

Syllad | The Rising MeghalayaOctober 27, 2021

Ka Khasi Student Union, Jowai Circle haka sngi Balang ka la phah mih lut ïa baroh ki nongtrei bad khang tala ïaka ophis treikam jong ka Mahader Gudar kaba long ka kynhun ba shimti ïaka jinglum khajna bad ka la khang ruh ïaka jinglum khajna na ki kali ba ïaid lyngba ïaka toll plaza kaba don ha Pasyih Ïalong, West Jaintia Hills District haduh 2 kynta eiei.

Kadaw ba pynlong ïaka KSU ban khang tala ka long ba la kut ka jingai por ba shibnai ïaki bor pynïaid jong ka NHAI ban pyntreikam ïaki Street light ba la pynïeng ha kylleng ki bynta ka surok bah ba hap hapoh ka jingpeit jong ka NHAI.

Ka bor District ba kynthup ïa u Magistrate u Bah MA Challam, u Bah A Mukhim MCS ADM West Jaintia Hills, ka DSP (Crime) ka Kong CW Lyngdoh ryngkat ka kynhun pulit haba ïoh jingtip halor kane, ki la wan poi ha kane ka jaka bad ki la pynlong ka jingïakren pynbeit hapdeng ki dkhot ka KSU kumjuh kitei ki nongtrei katei ka kynhun.

Na ka liang ki nongtrei ki la pyni ïaka shithi ba ki la phah shaka tnad MeECL naduh u 2018 na bynta ban leh connection ïaki street light kiba la dep pynïeng haki bynta ka surok bah bad haba ïadei bad ki footpath ki la dep ban ai jingthoh sha DC ophis.

Hadien ka jingïakren pynbeit, ki dkhot ka KSU ki la plie noh ïaka tala bad ai lad biang ban khrong khajna na ki kali.