Khang u DM ka East Jaintia Hills ia ki kali kit palat pud, bthah ia ka PHE ban maramot ia ki pipe um ha surok NH-6

Syllad | The Rising MeghalayaSeptember 17, 2024

Namar ka jingsniew palat liam ka surok bah National Highway 6 ha East Jaintia Hills District kiba la wanrah ruh ia ki jingsniew kali ba khah khah bad kiba lam pat sha ka jingsahkut kali kaba shyrkhei hapoh ka District, na ka liang u District Magistrate ka East Jaintia Hills District u la pynjari da ka kyndon Section 163 jong ka BNSS kaba khang pyrshah ia ki kali kiba kit palat pud hapoh ka District.

Katkum kane ka hukum ba la pynmih ha ka 16 tarik Nailur, u District Magistrate u la hukum ban pyrkhing ha kaba iadei bad ki kali kit mar bad ba ki dei ban kit tang hapoh ki kyndon ba la buh beit ryntih.

Haba pynpaw ba ki trok bad ki kali pickup ki ju kit ia ki maw bad ki mawthup kiba palat ia ka kynjang jong ka body kali bad kaba buh ka jingma ia ka mynsiem briew bad ia ki jingdon jingem namar ka jingsniew palat jong ka surok, kumta la hukum ia kine ki kali ba kim dei ban kit palat ia ka kynjang jong ka body kali bad ruh ban pynthikna ba ki maw ne mawthup kiba ki kit kim dei ban hap na ki kali jong ki ha ka por ba pynkit.

Halor ka kaiphot kaba iadei bad ka jingpyllait um da kiba buh ia ki jaka sait kali sha ki lynti surok National Highway, u District Magistrate u la hukum ia baroh kiba buh ia ki jaka sait kali kynthup ia ki nongshong shnong kiba don ha lynter ka surok bah NH-6 ba kin pynthikna ba ka um kan ym tuid satia shapoh surok.

Kumjuh ha kaba iadei bad ka jingpyniaid ia ki pipe um bad ki jingbthei kiba lam sha ka jinglang um shapoh jong ka surok, ka hukum ka la bthah ia ka Tnad Public Health Engineering (PHE) bad kiwei pat ki Tnad ba don bynta ban pynthikna halor ka jingjurip bniah ia ki pipe um man la ka por bad ban maramot haba don ki jingjulor bad ki jingbthei.