Khaw Rashon: Kiba bit ba biang ki dei ban weng kyrteng dalade na ka thup iohmyntoi, ong u ma Comingone Ymbon

Syllad | The Rising MeghalayaNovember 16, 2024

U Myntri ka tnad ka Food Civil Supplies & Consumer Affairs, Ma Comingone Ymbon ula kyntu iaki nongioh myntoi kiba bit kiba biang ban weng kyrteng dalade da ka mon sngewbha na ka thup jong ki nongioh myntoi (beneficiaries) khnang ba ki longiing kiba dei hok kin ioh myntoi.

U Myntri ula ong ia kane haba kren haka jingialang Regional Camp ba nyngkong eh halor ka National Food Security Act (NFSA) 2013 ha iing hall ka Moolibang, Shangpung, West Jaintia Hills District.

Ia kane ka Camp la khot pynlong da ka ophis jong u Deputy Commissioner (Supply), West Jaintia Hills District.

Ka jingthmu ba pynlong ia kane ka camp ka long ban pynsngewthuh bad ban pyntreikam hok ia ka National Food Security Act (NFSA), 2013 bad kaba kongsan kalong ban pynshai ia u paidbah halor ka jingdonkam ban pyniasoh iaka Aadhaar bad ka card rashon.

Haba kren shuh shuh u Ma Comingone ula kyntu ruh ia ki nongsynshar shnong ban peit thuh iaka jingeh bad ban weng iaki jingeh khnang ban lah ha kaban wanrah iaka jingkhuid jingsuba ha kaba iadei bad ka kam sam rashon ne mar bam.

U la pynpaw ruh ba ka jingbym lah ban pyniasoh ia u Aadhaar bad ki rashon card ka lah ban wanrah ia ka jingduh ia ki hok bad u la ban jur ia ka jingdonkam ban don ki jingujor ba pura ban pynbeit ia ki jingeh.

Haba kren halor ka jingpynslem ban ai ia ki rashon card thymmai, u Myntri u la pynshong nongrim ia ka jingshah ktah namar ka jingwan syllad jong ka khlam Covid-19, bad u la kdew ba ka khanasamari kaba la buh ban long ha u snem 2025 kan lah ban weng ia ki mat kiba dang sahteng.

U Deputy Commissioner Bah B.S. Sohliya, IAS u la pdiang sngewbha ia ki nongwan iashim bynta bad pynshai ruh ia ka jingthmu jong kane ka camp.

Katba na ka liang u Chairman of State Food Corporation Bah PS Thangkhiew ha ka jingkren u la pynshlur ia ki nongioh jingmyntoi ba kin pyntip ia ki jingbym iaid beit ha ki rukom sam ia ki mar bam lyngba ki lad jingujor bapher bapher, kynthup ia ki ophis jong ki Deputy Commissioner, ki helpline bad online portal.U la pynthikna ruh ban leh da kaba tyngeh pyrshah ia kino kino kiba pynkhein ain.

U Bah SK War na ka Tnad Food Civil Supplies and Consumers Affairs u la ai ia ka jingkren kaba bniah halor ka NFSA da kaba batai shaphang ka jingpyniasoh ia ka Aadhaar na ka bynta ban pynbha bad na ka bynta ka jingtreikam kaba iaid beit bad kaba khuid ba suba.U la kyntu ia ki nongshong shnong ba kin iashim bynta shitrhem ha kaba iadei bad ka jingpyniasoh ia ki Aadhaar khnang ban pynduh noh ia ki jingpynkylla arsien bad ban pynthikna ia ki jingmyntoi kumba la thmu.

Ha kane ka camp la pyntp ruh ia ki nongwan iashim bynta halor ki rukom ujor, kynthup ia u nombor ba lah ban phone khlem donkam jinglut u 1967, WhatsApp (+919402327737), bad ka Meghalaya Public Grievance Redressal and Monitoring System (megPGRAMS) ha ka www.megpgrams.gov.in. Lah ruh ban ujor beit beit sha ki ophisar ba dei peit ia ki jingeh jong ka District (DGO) bad ki nongiarap ba dei peit ia ki jingeh (AGRO).

Ki ophisar kiba kynthup ia u Aditya Verma, IAS, Sub-Divisional Officer (Sadar) East Jaintia Hills District, bad u Bah A.L. Bareh, MCS, Assistant Commissioner ka South West Khasi Hills District ki la pynpaw ia ka jingdonkam ia ka jingiatreilang na ka bynta ka jinglah pyniaid beit ia ka NFSA.Ki la kdew ruh halor ki jingeh ha kaba pynsngewthuh shaphang ka jingpyniasoh ia u Aadhaar bad halor ka jingpyrshang lang ban pynsngewthuh ia ki paidbah.

Kiwei pat kiba la aijingkren ki kynthup ruh ia u Member Secretary ka Meghalaya State Food Commission u Bah D.M. Suja, MCS, bad u Member u Ravi Gurung.