Khie im biang ka kam tih Uranium ha Meghalaya, thoh ka NEST sha ka Sorkar pdeng ba dei ban sdang noh ka jingtih

Syllad | The Rising MeghalayaMarch 9, 2024

Ka mat kaba iadei bad ka jingtih Uranium ha Meghalaya ka la khie im biang hadien ba na ka liang ka seng North East Sunshine Trust (India) kaba dei ka seng treimon sngewbha ka la phah da ka dorkhas sha u Myntri ka sorkar Pdeng uba khmih ia ka Tnat Atomic Energy u Dr Jitendra Singh ha ka 26 tarik u Rymphang ba la dep ban dawa ba dei ban sdang noh ia ka projek tih Uranium ha kane ka jylla.

Ka NEST (I)) lyngba ka Founder Trustee bad Chairperson ka Kong Elizabeth Matthews Nongbri ka la ong  ba ka la phah ruh ia ka  detailed project report (DPR) kaba la pynkhreh da kane ka kynhun na ka bynta ban sdang noh ia kane ka jingtih uranium ha kane ka Jylla.

Ka Nongbri ka la ong ba, “Ha u bnai Naiwieng 2023 ha ka por ba la pynlong ia ka National Ex-Servicemen Convention ha Kurukshetra, Nga la iakynduh ia u Col Pravat Kumar Panda (Retd), Independent Director, Uranium Corporation of India Ltd (UCIL). U la rah ia ka mat ban sdang noh ia ka projek tih Uranium ha Meghalaya. Kumba phi tip ba ka jingjurip da ka sorkar India ka pynpaw halor ka jingdon bun bah jong une u marpoh khyndew hapoh West Khasi Hills District ka Meghalaya. Ki jingpyrshang ban ioh tih ia une u marpoh khyndew ba kordor ha kine ki khathynniew tylli ki snem kiba la leit noh kam shym la seisoh namar ka jingjur jong ka jingpyrshah da ki paidbah. Ka UCIL ka la hap ban khangdam noh ia ka ophis jong ka ha Shillong.Ka jingiamynjur hapdeng ka sorkar Pdeng bad ka sorkar Jylla ha u 2009 ban ailad wai jaka ha West Khasi Hills shwa kan ka jingthmu tih Uranium la pynkut noh ha u snem 2016. Ka jingantad halor ka jingdon jong une u marpoh khyndew ka long kaba bun bha.Katba ki jylla kum ka Jharkhand ki la ioh jingmyntoi lyngba ka jingdon jong une u marpoh khyndew uba khyndiat ha ki jaka jong ki, ka Meghalaya kan ioh nong shibun lyngba kane ka jingdon bun jong une u marpoh khyndew.”

“Ka NEST (I) kaba don ia ka tyllong bad ki riew shemphang kan lah ban pynurlong ia kane ka jingthmu. Ngi don ia ki lad ban lah ban  pyniadei bad ki trai shnong, ban pynkohnguh ia ki halor shibun ki jingmyntoi ki ban wan hapoh ka thain bad halor ki jingkylla ha ka rukom im lada jia ba pynkynriah ia ki,” ka la ong.

Haba pynpaw bniah ia ka Policy Document bad ka jingpynkhreh ban pyniaid shakhmat ia kane ka jingthmu ka la pynmih ka jingsngewkhia na ki kynhun bapher bapher kiba ia don bynta. Ka jingpyrshah ha ki snem kiba la leit noh ka la wanrah ia ka jingpynkylla ha u snem 2016, hynrei na ka liang ka sorkar pdeng ka dang iai neh. Ki jingsngewkhia na ki kynhun kiba ia don bynta ki kynthup halor ka jingshah ktah ha ka mariang, ia ka ioh ka kot bad ka imlang sahlang bad kiwei pat ki bynta.

Lah ban kdew ba kane ka jingdawa jong kane ka Seng ka la wan long ruh wat hadien ba ka liang ka Sorkar Jylla kumjuh ka Khasi Hills Autonomous District Council (KHADC) ki la dep ban pynkut noh ia kane ka mat jong ka kam tih Uranium ha Meghalaya naduh kine ki snem kiba la leit noh.