Khih khohreh ka EC u ma Thombor Shiwat ban hiar Mukroh

Syllad | The Rising MeghalayaDecember 2, 2022

Hadien ka jingshah kynnoh poiwir ki nongshong shnong ka Mukroh ba kiwei ki shnong ha ki jaka khappud Assam Meghalaya, ka Executive Committee jong ka Jaintia Hills Autonomous District Council (JHADC) kaba ialam da ka NPP kan hiar sha ka shnong Mukroh haka sngi ba ar ka taiew ban wan.

U khliehduh ka JHADC u Ma Thombor Shiwat ula pyntip ia kane ha ki nongialam ka Hynniewtrep Border Disputed Redressal Forum bad ki nongshong shnong ka Elaka Labang Nangphyllut & Pangam Raliang bad kiwei kiwei ki seng haka jingiakynduh jong ki ha kamra treikam jong u haka sngi Thohdieng.

Ki nongshong shnong jong ka Elaka Labang Nangphyllut & Pangam Raliang bad ka Hynniewtrep Border Disputed Redressal Forum haka jingïakynduh ia u u CEM kila ai da ka dorkhat bad ki la pynpaw ka jingpyrshah jur halor ka jingkren beiñ jong u CEM ka Karbi Anglong Autonomous Council u Tuliram Ronghang haka 29 tarik Naiwieng haka jingwan jurip jong u iaka shnong Mukroh.

Kane ka jingwan jurip u CM Karbi Anglong Autonomous Council kalong hadien ka jingjia shahsiat iap ki 5 ngut ki nongshong shnong ka Mukroh bad u wei u nongtrei forest guard ka Assam haka 22 tarik u Naiwieng 2022.

Also Read | Iasylla ki politician bad ki heh saipan haka jingkhaii dieng tuh ha khappud Assam Meghalaya: Chandame

“Ngi ki Khasi Pnar ba shong ba sah hangne ngim dei ki nongsah beaiñ ne kita ki illegal settler kumba ong u Ronghang, ngi dei ki trai shnong ki ri trai muluk ha kane ka thaiñ bad dei ma ngi ba shnong basah shwa ban ïaki Karbi, ymdei ma ngi ba sah sha Karbi Anglong hynrei dei maki ba wan sah wan shong sha ka Ri ka Hima jong ngi”, la ong u Chandame Sungoh uwei na ki nongshong shnong ka thaiñ Block I bad uba dei ruh u Chairman ka Hynñiewtrep Border Disputed Redressal Forum.