Khlad hashen ka longkmie, mynsaw jur u nongniah ka scooty ba shah tynrah haka trok

Syllad | The Rising MeghalayaApril 14, 2025

Ha kawei ka jingjia tyngkhuh kali kawei ka longkmie ka la khlad noh hashen katba uwei pat u la mynsaw jur hadien ba ka scooty kaba ki shong ka la shah tynrah ha kawei ka trok ka bym lah ban ithuh ha ka surok Shillong Bypass ha ka thain Umroi hajan Tyndai Resort.

Ha kane ka jingjia kaba la jia ha ka por kumba 4 baje janmiet jong ka 13 tarik Iaiong. La iathuh kane ka trok ka la phet krad noh na katei ka jaka hadien jong katei ka jingjia.

Ka khubor ka iathuh ba katei ka lanot kaba la khlad noh ka dei kaba la tip kyrteng kum ka Kong Sidora Langstieh 29 snem rta kaba dei na ka shnong Nongsder Block B, bad uwei u briew uba la mynsaw u dei uba kyrteng u Rai Singh Laloo 30 snem rta uba dei na Umroi Nongrah.

Katkum ki jingtip la iathuh ba katei ka trok ka bym lah ban ithuh ka la leit tynrah ia kane ka scooty kaba don ia u nombor ML 05 AA 9898 katba ki dang mih na Umroi Umdohbyrthih ban leit sha Umroi Nongrah.

Na ka liang ki bor pulit na Khapmara PIC ki la wan poi mardor ha kane ka jaka na ka bynta ban pynlong ia ka jingtohkit, bad ia une u briew uba la mynsaw la pynkit noh mar mar shapoh Bhoirymbong CHC na ka bynta ban aijingsumar.

Ki pulit ki la sdang ban pynlong ka jingthwet kaba jur ban lapdien ia katei ka trok.