Khlad kyndit u Kynjaimon Amse u nongiasaid ain bad nongtrei kam bhalang ka East Jaintia Hills ha ka jingjia tyngkhuh kali

Syllad | The Rising MeghalayaAugust 23, 2024

U nongiasaid ain bad u nongtrei kam bhalang uba ju kren ia ki jingshisha bad uba dang kiew shakhmat ha ki kam aijingshakri jong u ha ka imlang sahlang, u Bah Kynjaimon Amse u la khlad kyndit ha ka jingjia tyngkhuh kali kaba la jia hapdeng ka shiteng miet jong ka 22 ne 23 tarik mynta u bnai ha Khliehriat, East Jaintia Hills District.

Kane ka jingjia tyngkhuh kali kala jia ha Dkhiah East, Khliehriat bad iaka daw ym pat lah ban tip thikna haduh bala thoh iaka khubor.

Hynrei kane ka jingjia ba sngewsih ka la wan jia ryngkhat shi taiew hadien ba u Kynjaimon Amse u la ujor pyrshah sha ka JHADC halor ka jingai No Objection Certificate ia ka M/s Meghatop Cement Private Limited ha ka shnong Wahiajer, Elaka Narpuh na ka bynta ban seng ia ka karkhana dewbilat ha ka shnong Wahiajer, Elaka Narpuh khlem ka jingmynjur jong ka Dorbar Elaka Narpuh bad byrthen ruh ban mudui ia ka JHADC sha ka iingkashari lada kam lah ban pynduh noh ia kane ka NOC.

Ha ki sngi ba sdang jong ki jingtreikam jong u ha u snem 2017, u Kynjaimon u la pynpaw ia ka sur na ka bynta ki paidbah nongshong shnong jong ka shnong Huroi, Hingaria bad kiwei kiwei ki shnong ha shilynter ki jaka khappud ka India-Bangladesh namar ka jingbym don ia ka jingpyniasoh lyngba ki surok, ym don ki jaka sumar, ym don mobile phone tower ne ym don ka jingpynbiang mobile phone coverage nalor kiwei pat.

U Bah Kynjaimon Amse u la mudui pyrshah ruh ia ka Sorkar India bad ia ka National Highway Authority of India (NHAI) sha ka iingkashari High Court ka Meghalaya halor ka jingsniew palat pud jong ka lynti surok na Ratacherra sha Lumshnong kaba hap hapoh ka National Highway 6 ha shilynter jong ka East Jaintia Hills District.

Na ka liang ka Meghalaya State Legal Services Authority ha u bnai Rymphang 2023 ka la thung ia u Bah Kynjaimon ban trei kum u Legal Aid Counsel na ka bynta ka East Jaintia Hills lane halor kino kino ki mukotduma ba kyrpang lada la rah shabar ka jingpeit jingkhmih ka jong ki.

Ia u Kynjaimon Amse la kha ha ka 20 tarik u Kyllalyngkot 1994, bad u dei na ka shnong Umkiang kaba hap hapoh Lumshnong C&RD Block, East Jaintia Hills, bad haduh ba un da khlad noh u dang bat kum u Assistant Waheh Shnong jong ka shnong Umkiang.

U Bah Kynjaimon u la pyndep ia ka degree ha ka Law na Rajiv Gandhi National University of Law (RGNUL), Patiala, Punjab hadien ba u la pyndep ia ka Higher Secondary School na St. Edmund’s College, Higher Secondary Section.