Khlad kyndit u Romi Dkhar referee football ka EJHDFA

Syllad | The Rising MeghalayaSeptember 5, 2024

U Romi Dkhar, u referee ba pyniaid ia ki jingialehkai football ka East Jaintia Hills District Football Association (EJHDFA) ula khlad kyndit haka 5 tarik Nailur ha Khliehriat Civil Hospital.

La iathuh ba une u referee u dang shimbynta kum u assistant referee haka ban pyniaid jingialehkai 2nd Division ka EJHDFA haka 5 tarik Nailur haki ar tylli ki jingialehkai, hynrei hadien bala kut ka jingialehkai bad haka por ia dihsha ula ud shitom ba pang shadem, kumta mar mar la pynkit ia u sha hospital, hynrei hadien ka jingjurip ki doctor la pynbna ba ula khlad na kane ka pyrthei.

Une u referee ula noh synniang shibun sha ka EJHDFA ha ka kam pyniaid iaki jingialehkai football kum u referee, kata naduh u snem 2005. U Romi u dei na ka shnong Wapung Shnong, East Jaintia Hills District.

Ka EJHDFA kam lah khlem da pynpaw iaka jingsngewsih halor ka jingkhlad kyndit u Romi Dkhar uba long uwei na ki senior referee ka synjuk. “Kane ka jingkhlad jong u ka long ka jingduh kaba khraw iaka Association. U dei u rangbah ba iarap bha iaka Association khamtam ha kaba iadei bad ki game bad ki division ba kham heh. U dei u briew ba ieit bad ba shimkhia bha iaka kam,” la ong u General Secretary ka EJHDFA u bah James Sutnga.

Ka EJHDFA ka phah iaka jingsngewlem sha kiba ha ïing jong u Romi bad duwai ba U Blei nongbuh nongthaw un pyntngen iaka iing ka sem ka jong u.

Ka jingleit ontep ia u Romi Dkhar kan long haka 7 tarik Nailur ha Lumjingtep Balang Presbyterian.

Ka EJHDFA ka pyntip ruh bala pynsangeh ia baroh ki jingialehkai league haka sngi leit on tep ia u (L) Romi Dkhar.