Khlad noh I bah Patrick, u hockey coach bad DSO barim ka jylla

Syllad | The Rising MeghalayaJuly 24, 2020

I bah T. Patrick Nongrum ba long uwei na ki nongialehkai bad u coach hockey ka jylla bad ba la shongthait kum u District Sports Officer ka East Khasi Hills 2005, ila khlad noh hynne ka sngi.

Ha u snem 1986 ha ka por ba I la sdang ban trei ia ka kam, I la shim ia ka sien jam ban sdang ia ka jingialehkai hockey bad ha ka juh ka por ban kyntu ia ki khun samla jong ka jylla ba kin iasnoh kti ban ialehkai ia ka hockey.

Ban nang pynshlur ia la ki khun samla, I bah Patrick I juh pynlong ia ki prokram ai jinghikai (coaching camp).

I bah Patrick I la long ruh u President ba nyngkong ka synjuk ialehkai Meghalaya State Hockey Association (MSHA) kaba la seng ia ka ha u snem 1995 bad ha u Nailar jong u snem 2011,  I la long pat kum u adviser jong ka synjuk.

Na ka liang ka Meghalaya State Olympic Association (MSOA) ka dap da ka mynsiem kaba sngewkhia  halor ka jingkhlad noh ka jong I bah Patrick bad ka phah ruh ia u kyrwoh sngewlem sha ka iing ka sem.

Na ka liang Ka Dorbar Federation of Khasi States, kaba kynthup ruh ka Dorbar Ki Khlieh Nongsynshar ka Ri Hynniewtrep kila phah phah khubor sngewlem sha I Kong Jacinta War bad ki Khun i Bah Patrick Nongrum.

“Ka long shisha ka jingduh kaba khraw, ngi iai kynmaw ia ki kam ba bha ki kam kiba rad bah jong i Bah Patrick Nongrum, naduh ki por ba ngi ia  kitkam hapoh ka Dorbar Dong Main & Upland Road, ha ka Seng samla Laitumkhrah Pyllun, hapoh ka Executive Committee, Laitumkhrah Dorbar Shnong bad ruh ha ka Laitumkhrah Sports Social and Cultural Club ha kaba i (late) Bah T. Patrick Nongrum, i la long u nongaibuit ha ka Dong Main & Upland Road bad Seng Samla Laitumkhrah Pyllun, u Rangbah Shnong ka Shnong Laitumkhrah bad ruh u dkhot bad nongaibuit ka Laitumkhrah Sports Social & Cultural Club.

I Bah Patrick Nongrum i la long u riewkhmat uba la shimbynta ha kiba bun ki kam naduh ki kam kilan met haduh  ki kam synshar khadar hapoh ka Dong bad ka Shnong, bad i la long u paia uba khlain ia ki samla bad khamtam ia ki nongshong shnong jong ka Shnong Laitumkhrah. I Bah Patrick Nongrum i la long uwei u nongialam u nongbtin hapoh Shnong uba baroh ngin nym klet namar i la long u rangbah uba shisha ha kaba la ieng ka “shikyntien ka hok”  i la long uba kloi ban mih ha kano kano ka por na ka bynta ka Dong, ki Samla, bad ka Shnong. 

Ha kum kane ka por sa shisien ngi pynpaw ka jingsngewlem ka jong ngi halor ka jingduh jong ngi ia kum une u rangbah uba long ka nuksa babha ia ki longdien baroh,” la ong u Bah John F Kharshiing,Chairman, Ka Dorbar Ki Nongsynshar Ka Ri Hynniewtrep, Adviser & Spokesperson, Federation of Khasi States,bad nongkitkam barim ka Dorbar Dong Main & Upland Road, Laitumkhrah.