Khlad noh I MP barim Dr. Bajubon R Kharlukhi

Syllad | The Rising MeghalayaDecember 26, 2021

I dkhot barim ka Ïingdorbar Thawaiñ Lok Sabha, I Tymmen Basan Dr. Bajubon R. Kharlukhi, iba dei i kurim jong i Kong Pamela War, iba shong ba sah ha Mawlai Ïewrynghep, ila khlad noh ha ka 25 tarik Nohprah, 2021.

I Dr. Kharlukhi ila long iwei na ki nongïalam ka All Party Hill Leaders’ Conference (APHLC) kaba dei ka seng saiñpyrthei kaba la long hakhmat ban ïakhun ban ïoh ïa ka jylla bapura, ka jylla Meghalaya.

La kha ïa i Dr. Kharlukhi ha ka 8 tarik Risaw, 1939, bad ila pyndep ïa ki jingpule na Gauhati University, St. Anthony’s College, Shillong, bad ila ïoh ïa ka PhD na Gauhati University. I la pyndep ruh ïa ka Assam Civil Service ha u snem 1966. Hashwa kata, ha u snem 1964, ila long kum u Assistant Headmaster ka Langtor Government Aided High School.

Ha u snem 1983, i Dr. Kharlukhi ila shah jied sha ka Lok Sabha kum u MP ka Shillong Parliamentary Constituency ha kaba ila jop ïa kane ka ilekshon kum u kyrtong ka seng APHLC.

I Dr. Kharlukhi ila ju long teng ruh kum u Principal ka UCC College; Founder Principal ka Mawlai Presbyterian Higher Secondary School; bad Founder Principal Mawlai Presbyterian College.

Ila shah jied Tymmen Basan jong ka Balang Presbyterian Mawlai ha ka 25 tarik Risaw, 1987, bad ila long ruh i Secretary Shnong jong ka Mawlai Ïewrynghep ha u snem 1966.

I Dr. Kharlukhi ila long u Rangbah Shnong ka Mawlai Ïewrynghep naduh u snem 1981 haduh 1983.

Ka jingleit ontep ïa i kan long ha ka 27 tarik Nohprah, 2021 ha u Lum Jingtep ka Balang Presbyterian Mawlai.

Ka jingïaseng leit ontep kan sdang ha ka por 12 baje shiteng sngi ha ïing, bad ha ïingmane jong ka Balang Presbyterian Mawlai ha ka por 1 baje nohphai sngi.