Khlad noh u Bah Walter Kharkongor u nongshad ba tbit ba ju tip kum u Michael Jackson

Syllad | The Rising MeghalayaOctober 29, 2023

U Bah Walter Kharkongor 48 snem ka rta, ba ju khot ieit u Lung uba dei u nongshad ba pawnam ka jylla bad ia uba la ju tip ruh kum u Michael Jackson namar ka jingtbit shad ka jong u, u la khlad noh haka step Sngi U Blei bad yn pyndep ia ka jingleit on tep lashai ka sngi Nyngkong 30 tarik Risaw 2023 ha u lum jingtep ka Balang Catholic ha Umshorshor.

Lah ban pynkynmaw ba u Bah Walter uba shong ba sah ha Mawlai Nonglum u dei u nongshad ba pawnam uba ju shad ia ki jingrwai bad jingshad jong u nongrwai bad nongshad ba pawnam ka pyrthei u Michael Jackson ha kine ki khyndiat phew snem kiba la leit noh. Nalor ba u don ia ka dur ka dar bad u shniuh uba iasyriem bad une u nongshad ba pawnam ka pyrthei u Walter u ju sngewtynnad ruh ban riam ia lade kum Michael Jackson khamtam ha kine ki snem kiba la leit noh.

U Bah Walter u dei uba la jop ha kiba bun bah ki jingiakop shad ha kylleng, bad uba ju shah khot sngewbha ruh ha kiba bun ki jingialang kiba heh ban pyni ia ka sap shad ba kyrpang jong u.

U Bah Walter ula sdang ban shad ha ki snem kumba 1990 eiei bad lah bna haka rukom shad ban pyrthuh bud kum u Michael Jackson, uba dei u nongshad/nongrwai ba tbit tam na ri America. Kham hadien ha ki snem 2004 eiei, u lah pynmih ruh ia ka jingrwai kaba kyrteng “Mano?”

Ka seng All Meghalaya dancers’ Association (AMDA) ka kam ba u bah Kharkongor u dei u nongprat lynti ia ki nongshad haki por ba mynshwa bad kat haduh mynta bad u ju don ryngkat lang bad ka seng naka por shaka por ban ai mynsiem iaki riewdon don sap ngi.