Khlad noh u Dr. P Syngkon, sngewlem u Prof RC Laloo

Syllad | The Rising MeghalayaNovember 20, 2020

U Dr. P Syngkon ula khlad noh na kane ka pyrthei hadien ka jingkem pang shini kaba la bat ia u la khamslem hynnin ka miet haka jaka sumar ha sor Shillong.

U Dr. P Syngkon, udei uwei na ki nongshong shnong ka Jowai uba la synniang ha kiba bun ki bynta haka imlang ka sahlang. Ula bat kam ruh kum u vice president jong ka Jaintia District Sports Association kaba la tip mynta kum ka West Jaintia District Sports Association (WJDSA) naduh u snem 1991-2010.

Ula bat ruh iaka kam Medical Superintendent jong ka Jowai Civil Hospital hashuwa ba un shongthait.

U Prof RC Laloo, MLA barim jong ka Jowai, ula pynpaw ba ka jingkhlad u Dr. P Syngkon kadei ka jingduh kaba khraw iaka shnong Jowai.

“Ka jingkhlad u Dr. P Syngkon kadei ka jingduh kaba khraw ia nga shimet, udei u paralok uba nga la tip la ithuh mynta la 50 snem naduh 1970. Ia nga hi shimet kadei ka jingduh kaba khraw bad ka shnong Jowai bad ki paidbah hi baroh halor kane ka jingkhlad kyndit jong u,” la ong u Prof RC Laloo.

“U Dr. Syngkon u dei u briew uba iadon bynta haka shitom saja, uba don ka jingkitkhlieh na ka bynta ka miat ka bha ka imlang ka sahlang bad u long ruh u doctor uba kiwei ki dei ban bud iaka nuksa jong u,” ong shuh shuh u Prof. RC Laloo.

Haba phah iaka khubor sngewlem sha kiba haiing hasem u Prof Laloo ula ong “U Blei nongbuh nongthaw un donlang bad ka kurim, ki khun ki ksiew bad kiba haiing hasem jong phi baroh ha kum kane ka por ba wan kah dum u lyoh. Leit Suk Ma Pait.”

Na kaliang u Working president ka WJDSA u ma EMH Passah, ula ong baka jingkhlad u ma Pait kadei ka jingduh kaba khraw iaka Jowai bad ka synjuk bad ula ong ba nakaliang ka WJDSA ka phah ka khubor sngewlem sha baroh kiba ha iing hasem u Dr. Pait.