Khlad noh u Mr Meghalaya barim ba iabit khlam COVID-19

Syllad | The Rising MeghalayaMay 27, 2021

U Pynshngain Langpen uba la ju ioh rah iaka nam Mr. Meghalaya lai sien kynthih bad Mr. 7 Wasa ula khlad noh hadien ba ula iabit iaka jingpang khlam COVID-19 haka sngi Palei.

Ka Jaintia Body Building & Fitness Association (JBB&FA) bad ka Bouncers Association of Meghalaya, Jaintia Hills Unit BAMJH kala phah iaka khubor sngewlem sha kiba haiing hasem u Pynshngain bad kila pynpaw ba kane ka jingkhlad jong u ka dei ka jingduh kaba khraw iaka synjuk.

“U Pynshngain u dei uwei na ki samla uba ai bor ai mynsiem bha iaka synjuk bad u dei ruh u nongai buit ia kine ki ar tylli ki synjuk ha Jaintia Hills ban iaid shakhmat ban plie lad plie lynti iaki samla ban ieng hala ki jong ki kjat,” la ong u Yoosar Kynjing u nongialam jong ka JBB&FA bad ka BAMJH.

Nyngkong eh ula wan sha rilum Jaintia haka rynsan iakop 7 Wasa ne ka 1st Body Building & Fitness Championship kaba pynlong da ka Jaintia Students’ Union (JSU) haka 8 Jylliew 2013. Ula rah ruh ia kane ka namjop.

U Bah Raphael Warjri, u nongseng  ka RITI Academy of Visual Arts ula ong ba u Langpen nalor ka kam Bodybuilder u dei ruh u briew uba tbit ban ohshrong bad dro dur.

U Pynshngain ryngkat bad kiwei ki nongoh dur bad nongdro dur ka RITI Academy kila oh dur ia u mot u Babu Jeebon Roy and Wickliffe Syiem.