Khlad sa ka longkmie kiew ka jingiap sha ka 4 na ka jingbam ia u tit haka shnong Saphai, West Jaintia Hills

Syllad | The Rising MeghalayaJune 2, 2024

Hadien ka jingkhlad noh jong ki laingut ki khynnah rit, mynta sa kawei ka longkmie ka la khlad noh haka 2 tarik Jylliew namar ka jingbam ia u Tit khlaw ba long bih ha ka shnong Saphai kaba hap hapoh Laskein C&RD Block, West Jaintia Hills district.

Lah ban kdew ba ki la don haduh 11 ngut ki briew na ki lai tylli ki longiing ha ka shnong Saphai kiba la shitom jur hadien ba ki la ioh bam ia u tit khlaw ba long bih ia uba ki la leit ban kheit na ka jaka khlaw kaba marjan shnong.

Na ka liang kiba haiing hasem ki la pynthikna ba ka Anna Suchiang 56 snem rta ka la khlad noh hapdeng ka jingshah sumar hapoh North Eastern Indira Gandhi Regional Institute of Health and Medical Sciences (NEIGRIHMS). U kurim jong ka u Obar Sutnga 70 snem rta, u Nidawan Kanai 12 snem rta ruh ki dang don hapdeng ka jingshitom jur hapoh NEIGRIHMS.

Ki lai ngut kiwei pat ki khynnah rit, kata kiba kynthup ia u Wansalan Suchiang (14), Kitlangki Suchiang (10), bad ka Riwansaka Suchiang (8 snem rta), ki la khlad noh hapoh Jowai Civil Hospital and MCH Hospital. Ka kmie jong ki ka Kong Jumonlang Suchiang 43 snem rta ia kaba la pynkynriah noh shapoh Nazareth Hospital in Shillong ha ryngkat u khun ba dang 11 bnai jong ka ki dang don hapdeng ka jingshah sumar.

Kiwei pat kiba don hapdeng ka jingshitom jur ki kynthup ia ka Ribaitki Shadap bad Shanmi Chympa kiba dang don hapdeng ka jingshah sumar hapoh Jowai Civil Hospital, Ialong.